ന്യൂഡല്ഹി: 500 ന്റെയും 1000 ത്തിന്റെയും നോട്ടുകള് പിന്വലിച്ചതുമായി ബന്ധപ്പെട്ട ബുദ്ധിമുട്ടുകള് കുറയ്ക്കാന് കൂടുതല് നടപടികളുമായി ആര്ബിഐ. ഒരു കോടി രൂപ വരെ വായ്പയെടുത്തവര്ക്ക് തിരിച്ചടവിന് 60 ദിവസം കൂടി അധികമായി അനുവദിച്ചു. നവംബര് ഒന്നിനും ഡിസംബര് 31 നും ഇടയില് അടയ്ക്കേണ്ട തുകയ്ക്കാണ് ഇളവ് ബാധകമാകുക.
ബാങ്കുകളില് നിന്നും ധനകാര്യ സ്ഥാപനങ്ങളില് നിന്നും വായ്പയെടുത്തവരും ഇളവിന് അര്ഹരാകും. വീടിനും വാഹനത്തിനും കാര്ഷിക ആവശ്യത്തിനും എടുത്ത ഒരു കോടി രൂപ വരെയുളള വായ്പകള്ക്ക് ഈ ഇളവ് ബാധകമാകും. ചെറുകിട വായ്പകള് കിട്ടാക്കടമായി കണക്കാക്കുന്നതിലും ഇളവ് വരുത്തി. തിരിച്ചടവിന് കൂടുതല് സമയം വേണ്ടി വന്നതിനാലാണ് നടപടിയെന്ന് ആര്ബിഐ വാര്ത്താക്കുറിപ്പില് അറിയിച്ചു.
ആര്ബിഐയുടെ നടപടി സ്വാഗതാര്ഹമാണെന്ന് ഭവന, വാഹന വായ്പാ വിതരണ സ്ഥാപനങ്ങളും ബാങ്കുകളും പ്രതികരിച്ചു. നോട്ടുകള് പിന്വലിച്ചതുമൂലം തുക തിരിച്ചടയ്ക്കാന് കഴിയാതെ പലരും നിസ്സഹായാവസ്ഥയിലായിരുന്നുവെന്നും ഇളവ് അനുവദിച്ചത് ഇവര്ക്ക് അധികബാധ്യതയില്ലാതെ തിരിച്ചടവിന് സഹായകമാകുമെന്നും കമ്പനി മേധാവികള് വ്യക്തമാക്കി.