ന്യൂയോർക്ക് : വാട്സാപ്പിനെ ഏറ്റെടുത്ത ഫേസ്ബുക്കിന് വിവരസുരക്ഷ മാനദണ്ഡങ്ങൾ പാലിക്കാത്തതിനെ തുടർന്ന് വൻപിഴ. യൂറോപ്യൻ യൂണിയനാണ് ഫേസ്ബുക്കിന് 122 മില്യൺ ഡോളർ ( ഏകദേശം 800 കോടി രൂപ ) പിഴയിട്ടത്.
2014 ൽ 19 ബില്യൺ യു എസ് ഡോളറിനാണ് ഫേസ്ബുക്ക് വാട്സാപ്പിനെ ഏറ്റെടുത്തത്. ഫേസ്ബുക്ക് വിവരങ്ങൾ വാട്സാപ്പുമായി പങ്കുവയ്ക്കുകയില്ലെന്നായിരുന്നു ഫേസ്ബുക്ക് യൂറോപ്യൻ കമ്മീഷനിൽ അറിയിച്ചിരുന്നത്. എന്നാൽ കഴിഞ്ഞ ആഗസ്റ്റിൽ വാട്സാപ്പ് വിവരങ്ങൾ ഫേസ്ബുക്കിൽ പങ്ക് വയ്ക്കുമെന്ന് കമ്പനി വ്യക്തമാക്കി .
ഇത് ഓൺലൈൻ പരസ്യ രംഗത്ത് മറ്റ് കമ്പനികളേക്കാൾ ഉയർന്ന വരുമാനമുണ്ടാക്കാൻ ഫേസ്ബുക്കിനെ സഹായിച്ചെന്ന് കമ്മീഷൻ വിലയിരുത്തി. യൂറോപ്യൻ യൂണിയന്റെ ലയന നിയമങ്ങൾ തെറ്റിച്ചതിനെ തുടർന്നാണ് ഫേസ്ബുക്കിന് പിഴയിടുന്നതെന്ന് കമ്മീഷൻ വ്യക്തമാക്കി.
2014 ൽ സമർപ്പിച്ച വിവരങ്ങളിൽ തെറ്റ് വരുത്തിയത് മനപൂർവ്വമല്ലെന്ന് ഫേസ്ബുക്ക് പറഞ്ഞു . നിയമമനുസരിച്ച് 276 മില്യൺ ഡോളർ പിഴയീടാക്കാമായിരുന്നെങ്കിലും അന്വേഷണവുമായി നന്നായി സഹകരിച്ചതിനെ തുടർന്ന് പിഴ കുറച്ച് നൽകാൻ കമ്മീഷൻ തീരുമാനിക്കുകയായിരുന്നു.