രാജ്യം ഇലക്ട്രിക്ക് യുഗത്തിലേക്ക് കുതിക്കുമ്പോൾ കൂടെയെത്താൻ മാരുതി സുസുക്കിയും . മാരുതിയുടെ ആദ്യ ഇലക്ട്രിക്ക് കാർ മോഡൽ അടുത്ത മാസം നടക്കുന്ന ഡൽഹി ഓട്ടോ എക്സ്പോയിൽ പ്രദർശിപ്പിക്കും. ഇ സർവൈവർ എന്നാണ് കാറിന്റെ പേര് . ടോപ്പ് ഓപ്പൺ കാറായ സർവൈവർ രണ്ട് പേർക്ക് യാത്ര ചെയ്യാൻ കഴിയുന്ന എസ്യുവി ആയാണ് പുറത്തിറക്കുന്നത്.
ഇലക്ട്രിക്ക് കാറുകളിൽ ഇനി വരാൻ പോകുന്ന മാറ്റങ്ങളും ആധുനിക സംവിധാനങ്ങളും എല്ലാം കണക്കിലെടുത്താണ് മാരുതിയുടെ ചുവടു വയ്പ്പ്. 2030 ഓടെ ഇന്ത്യ പൂർണമായും ഇലക്ട്രിക്ക് വാഹനങ്ങളിലേക്ക് മാറാനുള്ള കേന്ദ്രസർക്കാരിന്റെ പദ്ധതിക്ക് പിന്തുണ പ്രഖ്യാപിച്ചു കൊണ്ടാണ് മാരുതിയുടെ നീക്കം.
സുസുക്കി- ടോയോട്ട സഖ്യത്തിലൂടെയാണ് മാരുതി ഇലക്ട്രിക്ക് കാർ യാഥാർത്ഥ്യമാവുക. മാരുതിക്ക് ഇതിന്റെ സാങ്കേതിക വൈദഗ്ദ്ധ്യം സ്വന്തമായി ഇല്ലാത്തതിനാലാണ് ടൊയോട്ടയുമായി കൈകോർക്കുന്നത്. ഇലക്ട്രിക്ക് കാറുകൾക്ക് ആവശ്യമായ ചാർജിംഗ് സംവിധാനങ്ങളും ഒരുക്കുമെന്ന് കമ്പനി വ്യക്തമാക്കിയിട്ടുണ്ട്.