മുംബൈ: ദ്രുതഗതിയിലുള്ള സൈനിക നീക്കം ലക്ഷ്യമിട്ട് ഇന്ത്യ നിര്മ്മിക്കുന്ന മൂന്നാമത്തെ സ്കോര്പീന് ക്ലാസ് അന്തര്വാഹിനിയായ ഐ എന് എസ് കരഞ്ച് നീറ്റിലിറക്കി. മസഗോണ് ഡോക്കില് നടന്ന ചടങ്ങില് നേവി ചീഫ് അഡ്മിറല് സുനില് ലന്ബ മുഖ്യാതിഥിയായിരുന്നു.
മറ്റു സബ്മറൈനുകളില് നിന്ന് വ്യത്യസ്തമായി ഏറ്റവും മികച്ച അക്കോസ്റ്റിക് സൈലന്സിങ് ടെക്നിക്, വളരെ കുറഞ്ഞ നിലയിലുള്ള ശബ്ദതലം, ഹൈഡ്രോ ഡൈനാമിക്കലി ഒപ്റ്റിമൈസ്ഡ് ഷെയ്പ് എന്നിവയാണ് ഇതിന്റെ പ്രത്യേകതകള്. നാവികസേനയുടെ മറ്റ് ഘടകങ്ങളുമായി ചേര്ന്നു പ്രവര്ത്തിക്കാവുന്ന രീതിയിലാണ് ഇതിന്റെ രൂപകല്പ്പന നടത്തിയിട്ടുള്ളത്. 2019 മദ്ധ്യത്തോടെയാകും ഐഎന്എസ് കരഞ്ച് നാവികസേനയുടെ ഭാഗമാകുന്നത്.
പ്രോജക്ട് 75 ന്റെ ഭാഗമായി 70,000 കോടി രൂപ ചിലവില് ഫ്രഞ്ച് സഹകരണത്തോടെയാണ് ഇന്ത്യ ഐ എന് എസ് കരഞ്ച് നിര്മിച്ചത്. 1565 ടണ് ഭാരമാണ് ഇതിനുള്ളത്. ഐഎന്എസ് കാല്വരി, ഐഎന്എസ് ഖണ്ഡേരി എന്നിവയുടെ തുടര്ച്ചയാണ് ഐ എന് എസ് കരഞ്ച്.
ഡിസംബര് 14നാണ് ഈ ശ്രേണിയിലെ ആദ്യത്തെ അന്തര്വാഹിനിയായ ഐഎന്എസ് കാല്വരി നാവികസേനയ്ക്ക് കൈമാറിയത്. രണ്ടാമത്തെ അന്തര്വാഹിനിയായ ഐഎന്എസ് ഖണ്ഡേരിയുടെ നിര്മ്മാണം ഈ മാസം ആദ്യം പൂര്ത്തിയായി. പരീക്ഷണങ്ങള് കൂടി പൂര്ത്തീകരിച്ച് ഈ വര്ഷം പകുതിയോടെ നാവികസേനയ്ക്ക് കൈമാറും.
ഇന്ത്യയുടെ തന്ത്രപ്രധാനമായ മേഖലകളില് ചൈനയുടെ സാന്നിദ്ധ്യം വര്ധിക്കുന്നതായി റിപ്പോര്ട്ടുകള് വന്നതോടെയാണ് പ്രതിരോധമന്ത്രാലയം നാവിക സേനയെ ഇന്ത്യന് മഹാസമുദ്രത്തിന്റെ വിവിധ ഭാഗങ്ങളില് വിന്യസിക്കാന് തീരുമാനമെടുത്തത്. ഇതിന്റെ ഭാഗമായി 2005ലാണ് സ്കോര്പീന് ക്ലാസ് അന്തര്വാഹിനികള് നിര്മിക്കുന്നതിനായി കരാര് ഒപ്പിടുന്നത്.