തിരുവനന്തപുരം: പോലീസിന്റെ സേവനം ജനങ്ങളിലേക്ക് വേഗം എത്തിക്കുക എന്ന ലക്ഷ്യത്തോടു കൂടി കേരള പോലീസിന്റെ നേതൃത്വത്തില് രണ്ട് മൊബൈല് ആപ്ലിക്കേഷനുകള് പുറത്തിറക്കി. സിറ്റിസണ് സേഫ്റ്റി, ട്രാഫിക് ഗുരു എന്നിങ്ങനെയാണ് ആപ്ലിക്കേഷനുകള്ക്ക് പേരു നല്കിയിരിക്കുന്നത്.
സ്ത്രീകള്, മുതിര്ന്ന പൗരന്മാര് എന്നിവരുടെ യാത്രയിലെ സുരക്ഷയാണ് സിറ്റിസണ് സേഫ്റ്റി എന്ന ആപ്ലിക്കേഷനിലൂടെ ലക്ഷ്യമിടുന്നത്. യാത്ര ചെയ്യുന്ന വാഹനത്തെ സംബന്ധിച്ചുള്ള വിവരങ്ങളും വാഹനത്തിന്റെ ഫോട്ടോയും പോലീസ് കണ്ട്രോള് റൂമിലേക്ക് അയക്കാനുള്ള സൗകര്യം ഇതിലുണ്ടാകും. മറ്റൊരു സവിശേഷത ഇതില് ക്രമീകരിച്ചിരിക്കുന്ന പാനിക് ബട്ടണ് ആണ്. അപകട സാദ്ധ്യത തോന്നുകയാണെങ്കില് ഏതെങ്കിലും നമ്പര് ഡയല് ചെയ്യാതെ ഈ ബട്ടണ് അമര്ത്തിയാല് മതി. അപായസൂചന ഉടന് തന്നെ കണ്ട്രോള് റൂമിലേക്ക് എത്തും.
ജനങ്ങളില് ഗതാഗതത്തെ സംബന്ധിച്ചുള്ള അവബോധം ഉണ്ടാക്കുക എന്ന ലക്ഷ്യത്തോടെയാണ് ട്രാഫിക് ഗുരു പുറത്തിറക്കിയിരിക്കുന്നത്. ഇതില് ഉള്പ്പെടുത്തിയിരിക്കുന്ന ഗെയിം ട്രാഫിക് നിയമങ്ങളെക്കുറിച്ചുള്ള വിവരങ്ങള് നല്കുന്നു. ബമ്പര് ടു ബമ്പര് ട്രാഫിക്ക്, വരികളില് അച്ചടക്കം പാലിക്കേണ്ടതിന്റെ ആവശ്യകത, വാഹനത്തെ മറികടക്കുമ്പോള് മറികടക്കുമ്പോള് ശ്രദ്ധിക്കേണ്ട കാര്യങ്ങള്, വാഹനത്തിന്റെ വേഗം, പാര്ക്കിങ് തുടങ്ങിയ ഡ്രൈവിംഗിന്റെ വിവിധ വശങ്ങള് ഇതില് കാണാം.
ഗൂഗിള് പ്ലേ സ്റ്റോറില് നിന്നും സൗജന്യമായി ഡൗണ്ലോഡ് ചെയ്യാവുന്ന ആപ്ലിക്കേഷന് ആന്ഡ്രോയിഡ്, ഐഒഎസ് തുടങ്ങിയവയില് ലഭ്യമാണ്. കേരള പോലീസിനു കീഴിലുള്ള ഇന്ഫര്മേഷന് കമ്മ്യൂണിക്കേഷന് ആന്റ് ടെക്നോളജി വിഭാഗമാണ് ആപ്ലിക്കേഷന് ഡിസൈന് ചെയ്തിരിക്കുന്നത്. ആപ്ലിക്കേഷന് കൂടുതല് മെച്ചപ്പെടുത്തുന്നതിന് ജനങ്ങള്ക്ക് നിര്ദ്ദേശങ്ങള് നല്കുവാനും സാധിക്കും.