NewsIndia

ബംഗാളില്‍ മമതയ്‌ക്കെതിരേ ബിജെപി സ്ഥാനാര്‍ഥിയായി നേതാജിയുടെ അനന്തരവന്‍

കോല്‍ക്കത്ത: പശ്ചിമബംഗാളില്‍ തൃണമൂല്‍ കോണ്‍ഗ്രസ് നേതാവും മുഖ്യമന്ത്രിയുമായ മമത ബാനര്‍ജിക്കെതിരേ ബിജെപി സ്ഥാനാര്‍ഥിയായി നേതാജി സുഭാഷ് ചന്ദ്രബോസിന്റെ അനന്തരവനായ ചന്ദ്രകുമാര്‍ ബോസ് മത്സരിക്കും. ഡല്‍ഹിയില്‍ കേന്ദ്രമന്ത്രി സ്മൃതി ഇറാനിയാണ് ചന്ദ്രകുമാര്‍ ബോസിന്റെ സ്ഥാനാര്‍ഥിത്വം പ്രഖ്യാപിച്ചത്.

ഭവാനിപൂര്‍ മണ്ഡലത്തില്‍ നിന്നാകും മമത ബാനര്‍ജി മത്സരിക്കുക. ഇന്നലെ നടന്ന പടുകൂറ്റന്‍ റാലിയോടെ മമത തെരഞ്ഞെടുപ്പ് പ്രചാരണത്തിന് തുടക്കം കുറിക്കുകയും ചെയ്തു. പശ്ചിമബംഗാളില്‍ മാറ്റങ്ങള്‍ കൊണ്ടുവരാന്‍ സമയമായെന്നും അത് ബിജെപിക്ക് മാത്രമേ കൊണ്ടുവരാന്‍ കഴിയൂവെന്നും ചന്ദ്രകുമാര്‍ ബോസ് പറഞ്ഞു. ഇത് തന്റെ പോരാട്ടമല്ലെന്നും ബംഗാളിലെ വികസനത്തിനായുളള പോരാട്ടമാണെന്നും അദ്ദേഹം കൂട്ടിച്ചേര്‍ത്തു.

34 വര്‍ഷങ്ങളായി ബംഗാളില്‍ ഇടതുപക്ഷം ആയിരുന്നു ഭരിച്ചത്. പിന്നീട് ജനങ്ങള്‍ ഒരു മാറ്റം ആഗ്രഹിച്ചു. അങ്ങനെയാണ് തൃണമൂല്‍ കോണ്‍ഗ്രസിനെ അധികാരത്തിലേറ്റിയത്. എന്നാല്‍ മുന്‍ സര്‍ക്കാരുകളെപ്പോലെയാണ് തൃണമൂല്‍ എന്നാണ് ഇപ്പോള്‍ ജനങ്ങളുടെ പരാതിയെന്ന് ചന്ദ്രകുമാര്‍ ബോസ് ചൂണ്ടിക്കാട്ടുന്നു. സംസ്ഥാനത്തേക്ക് ഒരു നിക്ഷേപവും വരുന്നില്ല. ഫാക്ടറികള്‍ അടച്ചുപൂട്ടലിന്റെ വക്കിലാണെന്നും ചന്ദ്രകുമാര്‍ ബോസ് കുറ്റപ്പെടുത്തി.

കഴിഞ്ഞ തവണ ഭവാനിപൂരില്‍ 54,213 വോട്ടുകള്‍ മാത്രമായിരുന്നു മമതയുടെ ഭൂരിപക്ഷം. സിപിഎം ആയിരുന്നു പ്രധാന എതിരാളി. എന്നാല്‍ ബംഗാളില്‍ സിപിഎമ്മിന് ജനപിന്തുണ ഇടിഞ്ഞ സാഹചര്യത്തില്‍ മത്സരം ബിജെപിയും തൃണമൂല്‍ കോണ്‍ഗ്രസും തമ്മിലാകുമെന്നാണ് വിലയിരുത്തല്‍.

ഏപ്രില്‍ നാലിനാണ് ബംഗാളില്‍ നിയമസഭാ തെരഞ്ഞെടുപ്പ് ആരംഭിക്കുന്നത്. ആറ് ഘട്ടങ്ങളിലായിട്ടാണ് തെരഞ്ഞെടുപ്പ്. 294 സീറ്റുകളാണ് ബംഗാളില്‍ ഉളളത്.

0 Shares

Please scroll down for comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Close
Close