മുംബൈ: മഹാരാഷ്ട്രയിലെ രണ്ട് മുന്സിപ്പല് കോര്പ്പറേഷനുകളിലേക്ക് നടന്ന തെരഞ്ഞെടുപ്പില് ബിജെപിക്ക് വന് മുന്നേറ്റം. കല്യാണ് ഡോംബിവാലി മുന്സിപ്പല് കോര്പ്പറേഷനില് ബിജെപി 42 സീറ്റുകള് നേടി. ബിജെപി പിന്തുണയോടെ മത്സരിച്ച ആറ് സ്വതന്ത്രരും ഇവിടെ വിജയിച്ചിട്ടുണ്ട്. കഴിഞ്ഞ തവണ ഒന്പത് സീറ്റുകളായിരുന്നു ബിജെപിക്ക് ഇവിടെ ഉണ്ടായിരുന്നത്.
മഹാരാഷ്ട്ര നവനിര്മാണ് സേന 9 സീറ്റുകളില് ഒതുങ്ങി. കോണ്ഗ്രസിന് നാല് സീറ്റുകള് മാത്രമേ നേടാനായുളളൂ. 2010 ല് നടന്ന തെരഞ്ഞെടുപ്പില് കോണ്ഗ്രസ് 15 സീറ്റുകള് നേടിയിരുന്നു. എന്സിപി രണ്ട് സീറ്റുകളും സ്വതന്ത്രര് രണ്ട് സീറ്റുകളും നേടി. ഭൂരിപക്ഷത്തിനായി 10 സീറ്റുകളുടെ കുറവാണ് ശിവസേനയ്ക്ക് ഉള്ളത്. സിറ്റിംഗ് മേയര് കല്യാണി പട്ടേലിനെ ബിജെപിയുടെ സുമം നിഖം പരാജയപ്പെടുത്തിയതും സേനയ്ക്ക് തിരിച്ചടിയായി. 122 വാര്ഡുകളുളള മുന്സിപ്പല് കോര്പ്പറേഷനിലെ 117 വാര്ഡുകളിലേക്കാണ് തെരഞ്ഞെടുപ്പ് നടന്നത്.
81 അംഗ കോല്ഹാപൂര് മുന്സിപ്പല് കോര്പ്പറേഷനില് 27 സീറ്റുകള് നേടി കോണ്ഗ്രസ് ഏറ്റവും വലിയ ഒറ്റക്കക്ഷിയായി. എന്സിപിക്ക് 15 സീറ്റുകള് ഉണ്ട്. ബിജെപിയും സഖ്യകക്ഷികളും 32 സീറ്റുകളില് വിജയിച്ചു. ശിവസേന നാല് സീറ്റുകളിലും വിജയിച്ചു. 2010 ലെ തെരഞ്ഞെടുപ്പില് ബിജെപിക്ക് മൂന്ന് സീറ്റുകള് മാത്രമാണ് ഇവിടെ ലഭിച്ചത്. കോണ്ഗ്രസ് അന്ന് 31 സീറ്റുകള് നേടിയിരുന്നു.
കോല്ഹാപൂരില് എന്സിപിയുമായി ചേര്ന്ന് ഭരണം നടത്തുമെന്ന് കോണ്ഗ്രസ് വ്യക്തമാക്കി. മറ്റ് മൂന്നു പേരും കോണ്ഗ്രസിന് പിന്തുണ പ്രഖ്യാപിച്ചിട്ടുണ്ട്. ഞായറാഴ്ച നടന്ന തെരഞ്ഞെടുപ്പില് കല്യാണ് ഡോംബിവാലി മുന്സിപ്പല് കോര്പ്പറേഷനില് 47 ശതമാനവും കോല്ഹാപൂര് മുന്സിപ്പല് കോര്പ്പറേഷനില് 69 ശതമാനവുമായിരുന്നു പോളിംഗ്.
