കോഴിക്കോട് : സംസ്ഥാനത്തിന്റെ വികസനത്തിന് പുതിയ ദിശാബോധം നല്‍കുന്ന സമഗ്ര ദര്‍ശന രേഖ ബിജെപി കേരളഘടകത്തിനു വേണ്ടി അഞ്ചംഗ വിദഗ്ധസംഘം പ്രധാനമന്ത്രിക്ക് സമര്‍പ്പിച്ചു. കേരളത്തില്‍ മുന്‍ഗണനാക്രമത്തില്‍ നടപ്പിലാക്കേണ്ട ഇരുപത് പദ്ധതികളുടെ പട്ടികകയാണ് വിദഗ്ധസംഘം പ്രധാനമന്ത്രിക്ക് നല്‍കിയത്.
പ്രധാനമന്ത്രിയുടെ ‘മേക്ക് ഇന്‍ ഇന്ത്യ’ യുടെ ഭാഗമായി ‘മേക്ക് ഇന്‍ കേരള’ വ്യവസായ പാര്‍ക്കുകളുടെ ശൃംഖല, കോവളം മുതല്‍ കാസര്‍കോട് വരെ സ്മാര്‍ട്ട് വാട്ടര്‍ ഹൈവേ, ആഗോള ആയൂര്‍വേദ മിഷന്‍, ആറന്മുള കേന്ദ്രീകരിച്ച് പൈതൃകഗ്രാമം, വിനോദസഞ്ചാര വികസനത്തിനായി പുണ്യ നദികളേയും പുണ്യസ്ഥലങ്ങളേയും ചരിത്ര സ്ഥലങ്ങളേയും ബന്ധപ്പെടുത്തി ഗ്രേറ്റ് കേരള ഹെറിറ്റേജ് ട്രെയിന്‍, പമ്പാ ആക്ഷന്‍ പ്ലാനിനു പുറമേ ഭാരതപ്പുഴയും പെരിയാറും പുനരുജ്ജീവിപ്പിക്കാനുള്ള കര്‍മ്മപദ്ധതി തുടങ്ങിയവ ദര്‍ശന രേഖയില്‍ ഉള്‍പ്പെടും.
ലോക നിലവാരത്തിലുള്ള നേഴ്‌സസ് ട്രെയിനിംഗ് ഇന്‍സ്റ്റിറ്റ്യൂട്ട്, യുവാക്കള്‍ക്കായി നൈപുണ്യ വികസന പരിപാടി, തുടങ്ങി ഇരുപത് പദ്ധതികളാണ് പ്രധാനമന്ത്രിയുടെ പരിഗണനയ്‌ക്കായിസമര്‍പ്പിച്ചത്.
സി.വി. ആനന്ദബോസ്, ജെയിംസ് ജോസഫ്, ജി.സി. ഗോപാലപിള്ള, ഹരി.എസ്. കര്‍ത്താ, ആര്‍.എസ്.നായര്‍ (കണ്‍വീനര്‍) തുടങ്ങിയ വിദഗ്ധസമിതിയംഗങ്ങളാണ് പ്രധാനമന്ത്രിയെ കണ്ട് ദര്‍ശന രേഖ കൈമാറിയത്. ഐഎസ്ആര്‍ഒ മുന്‍ അദ്ധ്യക്ഷന്‍ ജി. മാധവന്‍ നായര്‍, വി.എന്‍ രാജശേഖരന്‍ പിള്ള എന്നിവരും ദര്‍ശനരേഖ തയ്യാറാക്കുന്നതില്‍ പങ്കാളികളായിരുന്നു.
കേരളത്തിന്റെ വികസന പ്രശ്‌നങ്ങള്‍ സംബന്ധിച്ച് സമൂഹത്തിലെ വിവിധ ഭാഗങ്ങളുമായി ചര്‍ച്ചകള്‍ നടത്തിയും വിഭിന്ന മേഖലകളില്‍ പ്രവര്‍ത്തിക്കുന്നവരില്‍ നിന്ന് അഭിപ്രായങ്ങള്‍ ശേഖരിച്ചും സംസ്ഥാനത്തിന്റെ വിവിധ ഭാഗങ്ങളില്‍ സെമിനാറുകള്‍ സംഘടിപ്പിച്ചുമാണ് ദര്‍ശനരേഖ തയ്യാറാക്കിയത്.
ദര്‍ശന രേഖ സ്വീകരിച്ച ശേഷം പദ്ധതി നടത്തിപ്പ് സംബന്ധിച്ച് സ്വന്തം അഭിപ്രായങ്ങളും പ്രധാനമന്ത്രി മുന്നോട്ട് വച്ചു. കാര്‍ഷികോല്പന്നങ്ങളുടെ വിപണനത്തിനും കര്‍ഷകര്‍ക്ക് മെച്ചപ്പെട്ട വില ഉറപ്പാക്കുന്നതിനും കേന്ദ്ര സര്‍ക്കാര്‍ നടപ്പിലാക്കിവരുന്ന ‘ഈ നാം’ പരിപാടി മാതൃകയാക്കണമെന്നായിരുന്നു പ്രധാനമന്ത്രിയുടെ പ്രധാന നിര്‍ദ്ദേശം.
