ന്യൂഡല്ഹി: വിവിധ ലോകരാജ്യങ്ങളിലെ പ്രവാസി ഇന്ത്യക്കാര്ക്കായി ഡല്ഹി ചാണക്യപുരിയില് നിര്മിച്ച പ്രവാസി ഭാരതീയ കേന്ദ്രം പ്രധാനമന്ത്രി നരേന്ദ്രമോദി രാജ്യത്തിന് സമര്പ്പിച്ചു. 2.7 കോടിയിലേറെ വരുന്ന പ്രവാസി സമൂഹത്തിന്റെ ഇന്ത്യയിലെ കേന്ദ്രീകൃത കാര്യാലയമായാണു പ്രവാസി ഭാരതീയ കേന്ദ്രം പ്രവര്ത്തിക്കുക. പ്രവാസി സമൂഹത്തിന്റെ മറ്റൊരു സ്വപ്നം കൂടിയാണ് ഇതോടെ പൂവണിഞ്ഞത്.
പ്രവാസി ഇന്ത്യന് സമൂഹത്തെ ആള്ക്കൂട്ടമായി മാത്രമല്ല ശക്തിയായി കാണണമെന്ന് പ്രധാനമന്ത്രി പറഞ്ഞു. കഴിഞ്ഞ രണ്ട് വര്ഷമായി പ്രവാസി സമൂഹത്തെ ലക്ഷ്യമിട്ട് മാനുഷീകപരിഗണനയുളള പല കാര്യങ്ങളും വിദേശകാര്യമന്ത്രാലയത്തിന് ചെയ്യാന് കഴിഞ്ഞിട്ടുണ്ടെന്ന്് പ്രധാനമന്ത്രി ചൂണ്ടിക്കാട്ടി. സംഘര്ഷവും ദുരന്തവുമുണ്ടായ പല വിദേശരാജ്യങ്ങളില് നിന്നും ഇന്ത്യക്കാരെ മാത്രമല്ല മറ്റ് രാജ്യക്കാരെപ്പോലും രക്ഷിക്കാന് നമുക്ക് കഴിഞ്ഞിട്ടുണ്ടെന്ന് അദ്ദേഹം ചൂണ്ടിക്കാട്ടി. സംഘര്ഷ സാഹചര്യങ്ങളില് എങ്ങനെയാണ് പൗരന്മാരെ രക്ഷിക്കുകയെന്ന് ഇന്ത്യ കാണിച്ചുകൊടുക്കുകയായിരുന്നു.
പ്രവാസികളെ ലക്ഷ്യമിട്ട് അടല് ബിഹാരി വാജ്പേയ് തുടക്കമിട്ട പ്രവാസി ഭാരതീയ ദിവസ് ഇന്നും മുടക്കമില്ലാതെ തുടരുന്ന കാര്യവും പ്രധാനമന്ത്രി പരാമര്ശിച്ചു. ഇന്ത്യയുമായി ബന്ധപ്പെടാന് ലോകം കൂടുതല് താല്പര്യം പ്രകടിപ്പിച്ചുകൊണ്ടിരിക്കുകയാണ്. മറ്റ് രാജ്യങ്ങളെ കാല്ക്കീഴിലാക്കണമെന്ന് ഇന്ത്യ ആഗ്രഹിച്ചിട്ടില്ല. ഒന്നാം ലോക മഹായുദ്ധത്തില് നിരവധി ഇന്ത്യന് സൈനികര്ക്ക് ജീവന് നഷ്ടപ്പെട്ടിട്ടുപോലും ഇന്ത്യ ഒരു രാജ്യത്തെയും അങ്ങോട്ട് ആക്രമിച്ചിട്ടില്ലെന്ന് പ്രധാനമന്ത്രി ചൂണ്ടിക്കാട്ടി.
പ്രവാസി ഭാരതീയ കേന്ദ്രയുടെ ഉദ്ഘാടനത്തിന് മഹാത്മാഗാന്ധിയുടെ ജന്മദിനം തന്നെ തെരഞ്ഞെടുത്തത് സന്തോഷകരമാണെന്നും പ്രധാനമന്ത്രി പറഞ്ഞു. വിദേശകാര്യമന്ത്രി സുഷമ സ്വരാജ്, കേന്ദ്രമന്ത്രിമാരായ ശ്രീപദ് യശോ നായിക്, വി.കെ സിംഗ്, എം.ജെ അക്ബര് തുടങ്ങിയവര് ചടങ്ങില് പങ്കെടുത്തു.
ഇന്ത്യയിലെ എല്ലാ സംസ്ഥാനങ്ങളില് നിന്നുമുളള കലയും സംസ്കാരവും സമ്മേളക്കുന്ന സ്ഥലമാണ് പ്രവാസി ഭാരതീയ കേന്ദ്രമെന്ന് വിദേശകാര്യമന്ത്രി സുഷമ സ്വരാജ് പറഞ്ഞു. ഗസ്റ്റ് റൂമുകള്, ബിസിനസ് സെന്റര്, ഇന്ത്യന് കള്ചറല് സെന്റര്, ഗവേഷണ കേന്ദ്രം, എക്സിബിഷന് ഹാളുകള്, റസ്റ്റോറന്റുകള് എന്നീ സൗകര്യങ്ങള് പ്രവാസി കേന്ദ്രത്തിലുണ്ട്.