ന്യൂഡല്ഹി: പ്രധാനമന്ത്രി നരേന്ദ്രമോദിയുമായി ഇന്ത്യയില് ത്രിദിന സന്ദര്ശനത്തിന് എത്തിയ ശ്രീലങ്കന് പ്രധാനമന്ത്രി റനില് വിക്രമസിംഗെ കൂടിക്കാഴ്ച നടത്തി. ഹൈദരാബാദ് ഹൗസിലായിരുന്നു കൂടിക്കാഴ്ച. മേഖലാസഹകരണം ഉള്പ്പെടെയുളള കാര്യങ്ങളില് ഇരുനേതാക്കളും ചര്ച്ച നടത്തിയതായിട്ടാണ് സൂചന.
നേരത്തെ കോണ്ഗ്രസ് അദ്ധ്യക്ഷ സോണിയാഗാന്ധി, മുന് പ്രധാനമന്ത്രി മന്മോഹന് സിംഗ്, കോണ്ഗ്രസ് നേതാവും മുന് വാണിജ്യമന്ത്രിയുമായിരുന്ന ആനന്ദ് ശര്മ തുടങ്ങിയവരുമായി വിക്രമസിംഗെ കൂടിക്കാഴ്ച നടത്തിയിരുന്നു. നേരത്തെ ഡല്ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില് ഇരുരാജ്യങ്ങളുടെയും ഹൈക്കമ്മീഷണര്മാര് ചേര്ന്നാണ് റനില് വിക്രമസിംഗെയെ സ്വീകരിച്ചത്.
കേന്ദ്ര ആഭ്യന്തരമന്ത്രി രാജ്നാഥ് സിംഗ് ഉള്പ്പെടെയുളളവരുമായും റനില് വിക്രമസിംഗെ കൂടിക്കാഴ്ച നടത്തി. പാക് അധീന കശ്മീരില് ഇന്ത്യ നടത്തിയ സര്ജിക്കല് സ്ട്രൈക്കിന് പിന്നാലെയാണ് റനില് വിക്രമസിംഗെയുടെ വരവെന്നത് ശ്രദ്ധേയമാണ്. ഇന്ത്യയുടെ സൈനിക നടപടിയെ ശ്രീലങ്ക നേരത്തെ തന്നെ പിന്തുണച്ചിരുന്നു.
ഇന്ത്യയുടെ നിലപാടിനോട് യോജിച്ച് ഇസ്ലാമാബാദില് സാര്ക്ക് ഉച്ചകോടി നടത്തുന്നതിലെ സുരക്ഷാ ആശങ്കയും ശ്രീലങ്ക പങ്കുവെച്ചിരുന്നു. വ്യാഴാഴ്ച ഡല്ഹിയില് നടക്കുന്ന ഇന്ത്യ സാമ്പത്തിക ഉച്ചകോടിയിലും ശ്രീലങ്കന് പ്രധാനമന്ത്രി പങ്കെടുക്കും.