ഇസ്ലാമാബാദ്: കശ്മീരില് നടക്കുന്നത് സ്വാതന്ത്ര്യസമരമാണെന്ന് ആവര്ത്തിച്ച് പാകിസ്ഥാന് പ്രധാനമന്ത്രി നവാസ് ഷെരീഫ്. പാക അധീന കശ്മീരില് ഇന്ത്യ നടത്തിയ സര്ജിക്കല് സ്ട്രൈക്കിന്റെ പശ്ചാത്തലത്തില് വിളിച്ചുചേര്ത്ത പാകിസ്ഥാന് പാര്ലമെന്റിന്റെ സംയുക്ത സമ്മേളനത്തിലാണ് കശ്മീരിലേത് സ്വാതന്ത്ര്യസമരമാണെന്ന് നവാസ് ഷെരീഫ് ആവര്ത്തിച്ചത്. കശ്മീര് വിഷയത്തില് യുഎന് പ്രമേയം നടപ്പാക്കാന് ലോകശക്തികള് ശ്രമിക്കണമെന്നും നവാസ് ഷെരീഫ് ആവശ്യപ്പെട്ടു.
പാകിസ്ഥാന്റെ ഇതുവരെയുളള നിലപാടുകളാണ് പാര്ലമെന്റിലും നവാസ് ഷെരീഫ് ആവര്ത്തിച്ചത്. ഇന്ത്യയെ കുറ്റപ്പെടുത്തിയ ഷെരീഫ് ഉറിയിലെ ഭീകരാക്രമണത്തില് യാതൊരു അന്വേഷണവും നടത്താതെയാണ് പാകിസ്ഥാനെതിരെ ഇന്ത്യ ആരോപണം ഉന്നയിച്ചതെന്നും പറഞ്ഞു. പാകിസ്ഥാന് യുദ്ധത്തിന് എതിരാണ്. സമാധാനമാണ് ആഗ്രഹിക്കുന്നതെന്ന പതിവ് വാക്കുകളും നവാസ് ഷെരീഫ് ആവര്ത്തിച്ചു.
ദാരിദ്ര്യം ഇല്ലാതാക്കാനാണ് പാകിസ്ഥാന് ഇന്ത്യയോട് മത്സരിക്കേണ്ടതെന്ന ഇന്ത്യന് പ്രധാനമന്ത്രി നരേന്ദ്രമോദിയുടെ വെല്ലുവിളിയും നവാസ് ഷെരീഫ് പരാമര്ശിച്ചു. കൃഷിയിടങ്ങളില് യുദ്ധടാങ്കുകള് നിരത്തി ദാരിദ്ര്യം മറികടക്കാനാകില്ലെന്ന് ഇന്ത്യ മനസിലാക്കണം. രക്തവും സ്ഫോടകവസ്തുക്കളും കൊണ്ട് ഒരിക്കലും ഈ ലക്ഷ്യം കൈവരിക്കാനാകില്ലെന്നാണ് ഇന്ത്യയോട് പറയാനുളളതെന്നും നവാസ് ഷെരീഫ് കൂട്ടിച്ചേര്ത്തു.
ഇന്ത്യ നടത്തിയത് കരാര് ലംഘിച്ചുളള വെടിവെയ്പ് മാത്രമാണെന്നായിരുന്നു പാര്ലമെന്റിലും ഷെരീഫ് സ്വീകരിച്ച നിലപാട്. വെടിവെയ്പില് രണ്ട് പാക് സൈനികര് കൊല്ലപ്പെട്ടതായും ഏത് തരത്തിലുളള കടന്നുകയറ്റവും നേരിടാന് പാകിസ്ഥാന് സൈന്യം സജ്ജമായിരുന്നെന്നും നവാസ് ഷെരീഫ് ആവര്ത്തിച്ചു.