തിരുവനന്തപുരം: വ്യവസായമന്ത്രിയായിരിക്കെ ഇ.പി ജയരാജന്‍ നടത്തിയ ബന്ധു നിയമനവുമായി ബന്ധപ്പെട്ട പരാതിയില്‍ ബിജെപി സംസ്ഥാന ജനറല്‍ സെക്രട്ടറി കെ. സുരേന്ദ്രന്‍ വിജിലന്‍സിന് മൊഴി നല്‍കി. അന്വേഷണ ഉദ്യോഗസ്ഥനായ ഡിവൈഎസ്പി ശ്യാംകുമാറിന് മുമ്പാകെയാണ് മൊഴി നല്‍കിയത്. വ്യവസായ വകുപ്പില്‍ ഇ.പി ജയരാജന്‍ നടത്തിയ നിയമനങ്ങള്‍ മുഖ്യമന്ത്രിയുടെ അറിവോടെയാണെന്ന് സുരേന്ദ്രന്‍ പറഞ്ഞു.
കോലിയക്കോട് കൃഷ്ണന്‍നായരുടെ മകന്‍ ടി.ഉണ്ണികൃഷ്ണന്‍ കിന്‍ഫ്ര അസി. മാനേജരായി ജോലി തരപ്പെടുത്തിയത് വ്യാജരേഖ ഹാജരാക്കിയാണ്. ഇപ്പോള്‍ ജനറല്‍ മാനേജരായി സ്ഥാനക്കയറ്റം നേടിയതും വ്യാജ എകസ്പീരിയന്‍സ് സര്‍ട്ടിഫിക്കേറ്റ് ഹാജരാക്കിയാണ്. ഇതിന്റെ തെളിവും സുരേന്ദ്രന്‍ വിജിലന്‍സിന് കൈമാറി. കെഎസ് ഡിപി എംഡിയായി നിരവധി ആരോപണങ്ങള്‍ നേരിട്ട കെ.ബി ജയകുമാറിനെ സിഡ്‌കോ എംഡിയാക്കിയതിലും അഴിമതിയുണ്ടെന്ന് കെ. സുരേന്ദ്രന്‍ ഉദ്യോഗസ്ഥരോട് വ്യക്തമാക്കി.
ഖാദി ബോര്‍ഡ് എംഡിയായിരുന്ന പട്ടികജാതി വിഭാഗത്തില്‍ പെട്ട രാമചന്ദ്രന്‍ ഐഎഎസിനെ മാറ്റി വാട്ടര്‍ അതോറിറ്റിയില്‍ ക്ലാര്‍ക്കായ രാജീവന്‍ പിള്ളയെ നിയമിച്ചതും സുരേന്ദ്രന്‍ ചൂണ്ടിക്കാട്ടി. വിവാദ വ്യവസായി വിഎം രാധാകൃഷ്ണന്റെ മകന്റെ ഭാര്യാപിതാവ് അശോക് കുമാറിനെ ക്ലേയ്‌സ് അന്‍ഡ് സെറാമിക്‌സ് എംഡിയായി തുടരാന്‍ അനുവദിച്ചതിലും അഴിമതിയുണ്ടെന്ന് സുരേന്ദ്രന്‍ വിജിലന്‍സിന് നല്‍കിയ പരാതിയില്‍ പറയുന്നുണ്ട്.
ആശാപുര ക്ലേ കമ്പനിയുടെ എംഡിയായിരുന്ന സതീഷിനെ കുണ്ടറ ക്ലേയ്‌സ് ആന്‍ഡ് സെറാമിക്‌സ് എംഡിയാക്കി നിയമിച്ചതിലും അഴിമതിയുണ്ട്. ആശാപുര, ചക്കിട്ടപ്പാറ ഖനനകമ്പനി പ്രതിനിധികളും മുഖ്യമന്ത്രിയുമായി കൂടിക്കാഴ്ച നടന്നതിനു ശേഷമാണ് ഈ നിയമനങ്ങള്‍ നടന്നത്. പൊതുമേഖലാ സ്ഥാപനമായ റുട്ട്‌റോണിക്‌സില്‍ 4 നിയമനങ്ങള്‍ നടത്തിയതില്‍ ജയരാജന്‍ 30 ലക്ഷം കൈക്കൂലി വാങ്ങിയെന്നും കെ. സുരേന്ദ്രന്‍ ഉദ്യോഗസ്ഥരോട് പറഞ്ഞു. 2 എന്‍ജിനീയര്‍മാരെയും രണ്ട് സൂപ്പര്‍വൈസര്‍മാരെയുമാണ് ഇവിടെ നിയമിച്ചത്.
