ബംഗളൂരു : രാഷ്‌ട്രീയ സ്വയംസേവക സംഘത്തിന്റെ മുതിർന്ന പ്രചാരകനും അഖില ഭാരതീയ സേവാ പ്രമുഖുമായിരുന്ന കെ സൂര്യനാരായണ റാവു – സുരുജി ( 93 ) അന്തരിച്ചു. ഇന്നലെ രാത്രി 11 മണിയോടെ ബംഗളൂരു സാഗർ അപ്പോളോ ആശുപത്രിയിലായിരുന്നു അന്ത്യം. 70 വർഷമായി സംഘ പ്രചാരകനായിരുന്നു.
ഇന്ന് രാവിലെ 8: 30 മുതൽ ആർ.എസ്.എസ് കാര്യാലയമായ കേശവകൃപയിൽ പൊതുദർശനത്തിനു വയ്‌ക്കുന്ന ഭൗതിക ദേഹം വൈകുന്നേരം 6: 30 നു ചാമരാജ് പേട്ട് ശ്മശാനത്തിൽ സംസ്കരിക്കും.1923 ആഗസ്റ്റ് 20 നു ബംഗളൂരുവിൽ ജനിച്ച സൂര്യനാരായണ റാവു 1942 ൽ വിദ്യാഭ്യാസ കാലത്താണ് സംഘവുമായി ബന്ധപ്പെടുന്നത്. 1946 ൽ സംഘ പ്രചാരകനായ അദ്ദേഹം പിന്നീട് തമിഴ്നാട് സംസ്ഥാനത്തിന്റെ പ്രചാരകായി.
കേരളം ഉൾപ്പെടുന്ന ദക്ഷിണ ക്ഷേത്രത്തിന്റെ പ്രചാരകായി നിയോഗിക്കപ്പെട്ട റാവു പിന്നീട് സംഘത്തിന്റെ അഖില ഭാരതീയ സേവാ പ്രമുഖായും സേവനമനുഷ്ഠിച്ചു. 2012 വരെ അഖില ഭാരതീയ കാര്യകാരി സദസ്യനായിരുന്നു.ആർ.എസ്.എസ് സർസംഘചാലക് മോഹൻ ഭാഗവത് , സർകാര്യവാഹ് ഭയ്യാജി ജോഷി , പ്രധാനമന്ത്രി നരേന്ദ്രമോദി തുടങ്ങിയവർ സുരുജിയുടെ ദേഹവിയോഗത്തിൽ അനുശോചനം അറിയിച്ചു.
