കൊച്ചി: നടി ആക്രമിക്കപ്പെട്ട കേസില് ദൃശ്യങ്ങള് ദീലീപിന് നല്കാനാവില്ലെന്ന് ഹൈക്കോടതി. കേസിലെ നിര്ണായക തെളിവായ മെമ്മറി കാര്ഡിലെ ദൃശ്യങ്ങളുടെ പകര്പ്പ് ആവശ്യപ്പെട്ട് കേസിലെ പ്രതിയായ നടന് ദിലീപ് സമര്പ്പിച്ച ഹര്ജിയാണ് ഹൈക്കോടതി സിംഗിള് ബെഞ്ച് തള്ളിയത്. കേസിലെ നിര്ണായക തെളിവായ ദൃശ്യങ്ങള് ദിലീപിന് നല്കാനാകില്ലെന്ന് ഹൈക്കോടതി പറഞ്ഞു.
ദൃശ്യങ്ങള് കൈമാറുന്ന നടിയുടെ സ്വകാര്യതയുടെ ലംഘനമാകുമെന്ന പ്രോസിക്യൂഷന് വാദം അംഗീകരിച്ചു കൊണ്ടാണ് ഹൈക്കോടതി ഉത്തരവ്. പ്രതിയുടെ ആവശ്യത്തിനല്ല ഇരയുടെ സ്വകാര്യതയ്ക്കാണ് പ്രാധാന്യം എന്ന് സര്ക്കാരും കോടതിയെ അറിയിച്ചിരുന്നു.
കേസിലെ രേഖകളില് പ്രതിക്ക് അവകാശമുണ്ടെന്നായിരുന്നു ദിലീപിന്റെ വാദം. എന്നാല് ഈ കേസിന്റെ പ്രത്യേക സാഹചര്യം പരിഗണിച്ച് ദൃശ്യങ്ങള് നല്കാനാകില്ലെന്ന് കോടതി വ്യക്തമാക്കി. ദിലീപും അഭിഭാഷകനും ദൃശ്യങ്ങള് കോടതിയില് വച്ച് കണ്ടിരുന്നു. കേസിന്റെ വിചാരണ വൈകിപ്പിക്കാനാണ് ഇത്തരം ഹര്ജികളുമായി എത്തുന്നത് എന്നാണ് പ്രോസിക്യൂഷന്റെ വാദങ്ങള്.
നേരത്തെ മജിസ്ട്രേട്ട് കോടതിയും സെഷന്സ് കോടതിയും ദൃശ്യങ്ങള് ആവശ്യപ്പെട്ടു കൊണ്ട് ദിലീപ് നല്കിയ ഹര്ജികള് തള്ളിയിരുന്നു. ഇതിനു പിന്നാലെയാണ് ദിലീപ് ഹൈക്കോടതിയെ സമീപിച്ചത്. നടിയെ ആക്രമിച്ച കേസില് സിബിഐ അന്വേഷണം ആവശ്യപ്പെട്ടുകൊണ്ടുള്ള ദിലീപിന്റെ ഹര്ജി ഹൈക്കോടതിയുടെ പരിഗണനയിലാണ്.