Kerala

കെഎസ്ആര്‍ടിസി എം പാനല്‍ ജീവനക്കാരെ പിരിച്ച് വിടണമെന്ന് ഹൈക്കോടതി

കൊച്ചി: കെഎസ്ആര്‍ടിസിയിലെ എം പാനല്‍ ജീവനക്കാരെ ഒരാഴ്ചയ്ക്കകം പിരിച്ചു വിടണമെന്ന് ഹൈക്കോടതി. പിഎസ്‌സി റാങ്ക് ലിസ്റ്റിലുള്ള ഉദ്യോഗാര്‍ഥികള്‍ സമര്‍പ്പിച്ച ഹര്‍ജിയിലാണ് നടപടി. ഹൈക്കോടതി ഡിവിഷന്‍ ബെഞ്ചിന്റേതാണ് ഉത്തരവ്.

പിഎസ്‌സി റാങ്ക് ലിസ്റ്റില്‍ ഉള്‍പ്പെട്ടിട്ടും കെഎസ്ആര്‍ടിസിയിലെ വിവിധ തസ്തികകളില്‍ നിയമനം ലഭിക്കാത്തതിനെ ചോദ്യം ചെയ്ത് സമര്‍പ്പിച്ച അപ്പീല്‍ ഹര്‍ജിയിലാണ് ഹൈക്കോടതി ഉത്തരവ്.

കെഎസ്ആര്‍ടിസി എംപാനല്‍ ജീവനക്കാരെ പിരിച്ചുവിടാനും പകരം പിഎസ് സി റാങ്ക് ലിസിറ്റിലുള്ളവരെ നിയമിക്കണമെന്നും ഹൈക്കോടതി ഉത്തരവില്‍ വ്യക്തമാക്കുന്നു. സുപ്രീംകോടതി മാനദണ്ഡമനുസരിച്ചായിരിക്കണം പിരിച്ചുവിടല്‍ നടപടി എന്നും കോടതി നിര്‍ദ്ദേശം നല്‍കി.

ഉത്തരവനുസരിച്ച് പത്ത് വര്‍ഷത്തില്‍ താഴെ പണിയെടുത്തവരും, വര്‍ഷത്തില്‍ 101 ദിവസം ജോലിയെടുക്കാത്തവരെയും കെഎസ്ആര്‍ടിസിക്കു പിരിച്ചുവിടേണ്ടി വരും. ഉത്തരവിന്റെ അടിസ്ഥാനത്തില്‍ 3600 എംപാനല്‍ ജീവനക്കാര്‍ക്ക് ജോലി നഷ്ടപ്പെടുമെന്നാണ് കണക്കുകള്‍ വ്യക്തമാക്കുന്നത്. ഒരാഴ്ചയ്ക്കകം ഉത്തരവ് നടപ്പാക്കാനാണ് ഹൈക്കോടതി നിര്‍ദ്ദേശം.

റാങ്ക് ലിസ്റ്റില്‍ ഉള്‍പ്പെട്ട കൊല്ലം സ്വദേശി കിഷോര്‍ അടക്കമുള്ള ഉദ്യോഗാര്‍ത്ഥികളാണ് ഹൈക്കോടതിയെ സമീപിച്ചത്. നിയമനം ലഭിക്കാത്തത് ചൂണ്ടിക്കാട്ടി നേരത്തെ സമര്‍പ്പിച്ച ഹര്‍ജി ഹൈക്കോടതി സിംഗിള്‍ ബെഞ്ച് തളളിയിരുന്നു. തുടര്‍ന്നാണ് ഡിവിഷന് ബഞ്ചില്‍ ഉദ്യോഗാര്‍ത്ഥികള്‍ അപ്പീല്‍ നല്‍കിയത്.

കെഎസ്ആര്‍ടിസിയില്‍ താല്‍കാലിക ജീവനക്കാരെ നിയമിച്ചതിനാല്‍ റാങ്ക് ലിസ്റ്റിലുള്ളവര്‍ക്ക് നിയമനം നല്‍കാന്‍ കഴിയില്ല എന്ന വാദമാണ് കെഎസ്ആര്‍ടിസി കോടതിയെ അറിയിച്ചത്.

കരാറടിസ്ഥാനത്തില്‍ ഏഴായിരത്തോളം ജീവനക്കാരാണ് കെഎസ്ആര്‍ടിസിയില്‍ ഉള്ളത്. ഉത്തരവ് നടപ്പാക്കുന്നതോടെ നാലായിരത്തോളം പേരുടെ ജോലി നഷ്ടമാകും.

322 Shares

Please scroll down for comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Close