India

ബജറ്റ് ഫെബ്രുവരി ഒന്നിന്; ഹല്‍വ തയാറാക്കല്‍ ചടങ്ങ് നടത്തി

ന്യൂഡല്‍ഹി: ഈ വര്‍ഷത്തെ പൊതുബജറ്റ് ഫെബ്രുവരി ഒന്നിന് കേന്ദ്രധനമന്ത്രി അരുണ്‍ ജെയ്റ്റ്‌ലി അവതരിപ്പിക്കും. ബജറ്റിന്റെ അച്ചടി കഴിഞ്ഞ ദിവസം ആരംഭിച്ചു. ബജറ്റ് അച്ചടിക്കുന്നതിന് മുന്നോടിയായുള്ള ഹല്‍വ തയാറാക്കല്‍ ചടങ്ങും നടത്തി. ധനമന്ത്രി അരുണ്‍ ജെയ്റ്റ്‌ലിയുടെ അസാന്നിദ്ധ്യത്തിലായിരുന്നു ചടങ്ങ്. ധനവകുപ്പിലെ ഉന്നതരാണ് ഹല്‍വ തയാറാക്കി ബജറ്റ് നടപടികള്‍ക്ക് തുടക്കം കുറിച്ചത്.

ചികിത്സയുടെ ഭാഗമായി നിലവില്‍ അമേരിക്കയിലാണ് അരുണ്‍ ജെയ്റ്റ്‌ലി. ഈ മാസം അവസാനത്തോടെ അദ്ദേഹം ചികിത്സ പൂര്‍ത്തിയാക്കി നാട്ടില്‍ മടങ്ങിയെത്തും. ഹല്‍വ തയാറാക്കി വിതരണം ചെയ്യുന്നതോടെയാണ് ബജറ്റ് നടപടി ക്രമങ്ങള്‍ക്ക് തുടക്കമാകുന്നത്. ബജറ്റ് അവതരിപ്പിക്കുന്നത് വരെ വകുപ്പിലെ ഉദ്യോഗസ്ഥരും അവരുടെ കീഴിലെ ജീവനക്കാരും പാര്‍ലമെന്റിലെ നോര്‍ത്ത് ബ്ലോക്കില്‍ തങ്ങും. ബജറ്റിന്റെ രഹസ്യ സ്വഭാവം കാത്തു സൂക്ഷിക്കുന്നതിനാണിത്.

റെയില്‍വേ ബജറ്റും യൂണിയന്‍ബജറ്റും ലയിപ്പിച്ചതിന് ശേഷമുള്ള മൂന്നാമത്തെ ബജറ്റാണ് ഇത്തവണ അവതരിപ്പിക്കുന്നത്. 2017ലായിരുന്നു ലയിപ്പിച്ച ശേഷമുള്ള ആദ്യ ബജറ്റ്. 2016 സെപ്തംബര്‍ 21നാണ് ഇരു ബജറ്റുകളും ലയിപ്പിക്കാന്‍ കേന്ദ്രസര്‍ക്കാര്‍ തീരുമാനിക്കുന്നത്. നീതി ആയോഗ് അംഗം ബിബേക് ഡെബ്രോയി അധ്യക്ഷനായ കമ്മിറ്റിയുടെ ശുപാര്‍ശ പ്രകാരമാണ് റെയില്‍വേ ബജറ്റും യൂണിയന്‍ ബജറ്റും ഒന്നിച്ച് അവതരിപ്പിക്കാന്‍ തീരുമാനിച്ചത്.

ജനുവരി 29നാണ് ബജറ്റ് സമ്മേളനം ആരംഭിക്കുന്നത്. ഇടക്കാല ബജറ്റാണ് ഇത്തവണ അവതരിപ്പിക്കുന്നത്. തിരഞ്ഞെടുപ്പ് വരെയുള്ള കാലത്തേക്കാണ് ഇടക്കാല ബജറ്റ്. അധികാരത്തിലെത്തുന്ന അടുത്ത മന്ത്രിസഭയാണ് പൂര്‍ണ ബജറ്റ് അവതരിപ്പിക്കുക.

1K Shares

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close