India

സീറ്റ് ധാരണയില്‍ മര്യാദ കാണിച്ചില്ല; സിപിഎമ്മിനെതിരെ വിമര്‍ശനവുമായി കോണ്‍ഗ്രസ് ബംഗാള്‍ ഘടകം

ബംഗാള്‍: സിപിഎമ്മിനെതിരെ കടുത്ത വിമര്‍ശനവുമായി കോണ്‍ഗ്രസ് ബംഗാള്‍ ഘടകം. സീറ്റ് ധാരണയില്‍ സിപിഎം മര്യാദ കാണിച്ചില്ലെന്ന് കോണ്‍ഗ്രസ് ആരോപിച്ചു. സിപിഎം നിലപാട് മാറ്റിയില്ലെങ്കില്‍ കോണ്‍ഗ്രസ് ഒറ്റയ്ക്ക് മത്സരിക്കും. ബംഗാള്‍ കോണ്‍ഗ്രസ് ഘടകത്തിന്റെ നിലപാട് ഹൈക്കമാന്‍ഡിനെ അറിയിച്ചു. അന്തിമ നിലപാട് ഹൈക്കമാന്റിന്റേതാണെന്നും ബംഗാള്‍ കോണ്‍ഗ്രസ് അധ്യക്ഷന്‍ സോമന്‍ മിത്ര പറഞ്ഞു. ഇടതുമുന്നണിയുടെ സൂര്യകാന്ത് മിശ്രയെയും വിഷയത്തില്‍ അതൃപ്തി അറിയിച്ചതായി സോമന്‍ മിത്ര വ്യക്തമാക്കി.

ലോക്സഭ തിരഞ്ഞെടുപ്പിന് മുന്നോടിയായി ബംഗാളില്‍ ഇടതുമുന്നണി 25 സ്ഥാനാര്‍ത്ഥികളുടെ പട്ടിക പുറത്തിറക്കിയതോടെയാണ് ഇരുകൂട്ടരുടേയും സഖ്യത്തില്‍ വീണ്ടും വിള്ളല്‍ വീണത്. കോണ്‍ഗ്രസ് മത്സരിക്കണമെന്ന് ആവശ്യപ്പെട്ട ചില മണ്ഡലങ്ങളിലും ഇടതുമുന്നണി സ്ഥാനാര്‍ത്ഥികളെ പ്രഖ്യാപിച്ചിട്ടുണ്ട്. ഇതാണ് കോണ്‍ഗ്രസിനെ ചൊടിപ്പിച്ചത്. സിറ്റിംഗ് സീറ്റുകളില്‍ പരസ്പരം മത്സരിക്കില്ലെന്നാണ് ഇരുപാര്‍ട്ടികളും തമ്മില്‍ ധാരണയായത്.

ഇടത് സ്ഥാനാര്‍ത്ഥി പട്ടിക പുറത്ത് വിട്ടത് ഇരുപാര്‍ട്ടികളും തമ്മിലുള്ള ധാരണ ചര്‍ച്ചകള്‍ പൂര്‍ത്തിയാകുന്നത് മുന്‍പാണെന്ന് ബംഗാള്‍ കോണ്‍ഗ്രസ് അധ്യക്ഷന്‍ സോമന്‍ മിത്ര ആരോപിച്ചു. പുരുലിയ, ബഷീര്‍ഹട്ട് സീറ്റുകള്‍ തങ്ങള്‍ക്ക് വേണമെന്ന് ആവശ്യപ്പെട്ടിരുന്നതായി സോമന്‍ മിത്ര വ്യക്തമാക്കി. ഈ സീറ്റുകള്‍ വിട്ട് നല്‍കി പ്രശ്നം പരിഹരിച്ചില്ലെങ്കില്‍ റായ് ഗഞ്ചിലും, മൂര്‍ഷിദാബാദിലും കോണ്‍ഗ്രസ് സ്ഥാനാര്‍ത്ഥിയെ നിര്‍ത്തും. പുരുലിയക്കും ബഷീര്‍ഹട്ടിനും പുറമെ കോണ്‍ഗ്രസ് ആവശ്യപ്പെട്ട ബറാസാത് മണ്ഡലത്തിലും ഇടത് മുന്നണി സ്ഥാനാര്‍ത്ഥിയെ പ്രഖ്യാപിച്ചിട്ടുണ്ട്.

കോണ്‍ഗ്രസിന് 17 സീറ്റ് നീക്കി വച്ചാണ് സിപിഎം നേതൃത്വത്തിലുള്ള മുന്നണി പട്ടിക പുറത്തിറക്കിയത്. സ്ഥാനാര്‍ത്ഥികളെ പ്രഖ്യാപിച്ച 25 മണ്ഡലങ്ങള്‍ ഒഴികെയുള്ള 17 മണ്ഡലങ്ങളില്‍ കോണ്‍ഗ്രസോ ഇടതുമുന്നണിയോ മത്സരിക്കുമെന്നാണ് ഇടത്മുന്നണി ചെയര്‍മാന്‍ ബിമന്‍ ബോസ് വ്യക്തമാക്കിയത്. പുരുലിയ, ബറാസാത് മണ്ഡലങ്ങളില്‍ കോണ്‍ഗ്രസ് സ്ഥാനാര്‍ത്ഥികളും മത്സരിച്ചേക്കുമെന്നും ബിമന്‍ ബോസ് സ്ഥാനാര്‍ത്ഥി പ്രഖ്യാപന വേളയില്‍ പറഞ്ഞിരുന്നു. ഇതാദ്യമായാണ് ലോക്സഭ തിരഞ്ഞെടുപ്പില്‍ സിപിഎം കോണ്‍ഗ്രസുമായി സീറ്റ് പങ്കിട്ട് മത്സരിക്കുന്നത്. അതേസമയം കഴിഞ്ഞ നിയമസഭ തിരഞ്ഞെടുപ്പില്‍ ഇരുപാര്‍ട്ടികളും ധാരണയിലാണ് മത്സരിച്ചത്.

531 Shares

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close