ന്യൂഡല്ഹി: കനത്തമഴയും വെള്ളപ്പൊക്കവും അസം, ബിഹാര് സംസ്ഥാനങ്ങള് കടുത്ത ദുരിതത്തില്. നേപ്പാളിലും വന് നാശമാണ് പ്രളയം വിതച്ചിരിക്കുന്നത്. ബ്രഹ്മപുത്ര,കോസി നദികള് കരകവിഞ്ഞൊഴുകുകയാണ്.അസമിലെ 28ല് 26 ജില്ലയിലും പ്രളയം നാശം വിതച്ചിരിക്കുന്നതായാണ് റിപ്പോര്ട്ടുകള്. പ്രധാനമന്ത്രി നരേന്ദ്രമോദി മുഖ്യമന്ത്രി സര്ബാനന്ദ് സോനേവാളയെ നേരിട്ട് വിളിച്ച് പ്രശ്നങ്ങള് ആരാഞ്ഞു.
അസമിലെ ഇരുപത്തിയാറ് ജില്ലകളിലായി 3181 ഗ്രാമങ്ങള് വെള്ളത്തിനടിയിലാണ്.26,45,533 പേര് പ്രളയബാധിതരാണ്.90,000 ഹെക്ടര് കൃഷിഭൂമിയില് വെള്ളം കയറി.10 ലക്ഷം മൃഗങ്ങളെ പ്രളയം ബാധിച്ചിരിക്കുന്നതായാണ് സര്ക്കാര് കണക്കുകള് പറയുന്നത്.
ബിഹാറില് പ്രളയം 31 ജീവന് അപഹരിച്ചുകഴിഞ്ഞു.ശിവഹര, ചംമ്പാരണ് മേഖലകള് ഒറ്റപ്പെട്ടു.അയല്രാജ്യമായ നേപ്പാളിലേക്കുള്ള റോഡ് ഗതാഗതം സ്തംഭിച്ചു. എല്ലാ നദികളും കരകവിഞ്ഞ് ഒഴുകുകയാണ്.
കേന്ദ്രസുരക്ഷാസേനകളുടെ നേതൃത്വത്തില് രക്ഷാപ്രവര്ത്തനം ഏറ്റെടുത്തിരിക്കുകയാണ്.