തിരുവനന്തപുരം: പൊതുജനങ്ങളില് നിന്ന് നേരിട്ട് പരാതി സ്വീകരിക്കുന്നതിനായി സംസ്ഥാന പോലീസ് മേധാവി ലോകനാഥ് ബെഹ്റ എല്ലാ പോലീസ് ജില്ലകളിലും അദാലത്ത് നടത്തും. വിദൂര സ്ഥലങ്ങളില് നിന്ന് ഡി.ജി.പിയെ കണ്ട് പരാതി നല്കാനായി വരുന്നവരുടെ ബുദ്ധിമുട്ട് മനസ്സിലാക്കിയാണിത്. സംസ്ഥാന പോലീസ് മേധാവി എല്ലാ ജില്ലകളും സന്ദര്ശിച്ച് പരാതി സ്വീകരിക്കും.
അദാലത്തിന്റെ ഒന്നാം ഘട്ടം അടുത്തമാസം നടത്തും. കൊല്ലം റൂറലില് ആഗസ്റ്റ് 16നും കാസര്ഗോഡ് 20നും വയനാട് 21നും ആലപ്പുഴയില് 30നും പത്തനംതിട്ടയില് 31നുമാണ് അദാലത്ത് നടക്കുക. ജില്ലാ പോലീസ് മേധാവിക്ക് പുറമേ എല്ലാ സബ് ഡിവിഷണല് പോലീസ് ഓഫീസര്മാരും സ്റ്റേഷന് ഹൗസ് ഓഫീസര്മാരും അദാലത്തില് പങ്കെടുക്കും.
സംസ്ഥാന പോലീസ് മേധാവിയുടെ സന്ദര്ശന വിവരവും അദാലത്ത് നടക്കുന്ന സ്ഥലവും തീയതിയും സമയവും സന്ദര്ശിച്ച വിവരവും വിവിധ മാദ്ധ്യമങ്ങള് വഴി വ്യാപക പ്രചരണം നടത്തുന്നതിന് ജില്ലാ പോലീസ് മേധാവിമാരെ ചുമതലപ്പെടുത്തിയിട്ടുണ്ട്. സംസ്ഥാന പോലീസ് മേധാവിയുടെ സ്പെഷ്യല് ടീം അദാലത്തിന് രണ്ട് ദിവസം മുമ്പ് അതത് ജില്ലകള് സന്ദര്ശിച്ച് ഒരുക്കങ്ങളും സാഹചര്യങ്ങളും വിലയിരുത്തും.
കൂടാതെ പോലീസ് ഉദ്യോഗസ്ഥരുടെ പരാതികളും ബുദ്ധിമുട്ടും മനസ്സിലാക്കുന്നതിനും ജോലിയുടെ കാര്യക്ഷമത വര്ദ്ധിപ്പിക്കുന്നതിനുള്ള നിര്ദ്ദേശങ്ങള് നല്കുന്നതിനുമായി ജില്ലകളില് ഒരു സഭ നടത്തുന്നതിനും സംസ്ഥാന പോലീസ് മേധാവി തീരുമാനിച്ചിട്ടുണ്ട്. ഈ സഭയില് എസ്.ഐ റാങ്കില് താഴെയുള്ള ഉദ്യോഗസ്ഥരും പങ്കെടുക്കും. ജില്ലയില് ഏതെങ്കിലും രണ്ട് പോലീസ് സ്റ്റേഷനുകളും സംസ്ഥാന പോലീസ് മേധാവി സന്ദര്ശിക്കും.