തിരുവനന്തപുരം: എസ്ബിഐയുടെ എടിഎമ്മുകള് ഇനി ഇരുപത്തിനാലു മണിക്കൂറും പ്രവര്ത്തിക്കില്ല. എടിഎം കാര്ഡ് ഉപയോഗിച്ചുള്ള തട്ടിപ്പുകള് വ്യാപകമായ സാഹചര്യത്തിലാണ് പുതിയ സമയനിയന്ത്രണങ്ങളുമായി എസ്ബിഐ രംഗത്തുവന്നിരിക്കുന്നത്.
ഇനി എടിഎം സേവനങ്ങള് രാത്രി 11 മുതല് രാവിലെ ആറുവരെ ലഭ്യമാകില്ല എന്നാണ് എസ്ബിഐ ഐടി വിഭാഗം ജനറല് മാനേജര് രാജേഷ് സിക്ക പുറത്തിറക്കിയ സര്ക്കുലറില് പറയുന്നത്. ഇതിലൂടെ എടിഎം തട്ടിപ്പുകള്ക്ക് വിലങ്ങിടാന് സാധിക്കുമെന്നും അദ്ദേഹം കൂട്ടിച്ചേര്ത്തു.
തട്ടിപ്പുകള് വ്യാപകമാകുന്നതായും നിരവധിപേര്ക്ക് സാമ്പത്തികനഷ്ടം ഉണ്ടാകുന്നതായും പരാതികള് ഉയര്ന്നതോടെ പല നിയന്ത്രണങ്ങളും ബാങ്ക് അധികൃതര് കൊണ്ടുവന്നിരുന്നെങ്കിലും അവയൊന്നും ഫലപ്രദമാകാത്ത സാഹചര്യത്തിലാണ് സമയനിയന്ത്രണങ്ങള് കൊണ്ടുവരുന്നതെന്ന് എസ്ബിഐ വ്യക്തമാക്കി.
ബാങ്കിന്റെ നിലവിലെ വ്യവസ്ഥകളനുസരിച്ച് 40,000 രൂപവരെ എടിഎമ്മിലൂടെ അക്കൗണ്ടിലേക്കോ കാര്ഡിലേക്കോ കൈമാറാനുള്ള സൗകര്യമണ്ട്. എന്നാല് രാത്രി 12 മണിക്കു തൊട്ടുമുമ്പും ശേഷവും തുടര്ച്ചയായി ഒരു കാര്ഡില് നിന്നു രണ്ട് ദിവസം പിന്വലിക്കാവുന്ന തുക ഒന്നിച്ച് പിന്വലിക്കുന്ന രീതി വ്യാപകമാകുന്നതായും ഇത് ബാങ്കിന് അസൗകര്യം സൃഷ്ടിക്കുന്നുണ്ടെന്നും ബാങ്ക് അധികൃതര് പറഞ്ഞു.
എസ്ബിഐയുടെ പുതിയ സമയനിയന്ത്രണ നിര്ദേശം സംബന്ധിച്ച വിവരം ഇടപാടുകാരെ അറിയിക്കാന് എടിഎം സ്ക്രീനിലും ശാഖകളിലും സൗകര്യമൊരുക്കുമെന്നും രാജേഷ് സിക്ക അറിയിച്ചു.