തിരുവനന്തപുരം: പ്രളയദുരിതത്തിലകപ്പെട്ടവര്ക്കായി സാലറി ചലഞ്ചിലൂടെ സ്വരൂപിച്ച പണം ദുരിതാശ്വാസ നിധിയിലേക്ക് നല്കാതെ ജീവനക്കാരെ പറ്റിച്ചു. കെ.എസ്.ഇ.ബി സാമ്പത്തിക പ്രതിസന്ധിയില് ഉള്ളതിനാലാണ് പണം കൈമാറാതിരുന്നതെന്നാണ് കെ.എസ്.ഇ.ബി ചെയര്മാന് എന്.എസ് പിള്ള മാധ്യമങ്ങളോട് പറഞ്ഞത്.
സാലറി ചലഞ്ചിന്റെ ഭാഗമായി ജീവനക്കാരുടെ ശമ്പളത്തില്നിന്ന് ഒരു വര്ഷംകൊണ്ട് പിടിച്ചത് 136 കോടി രൂപ. ഒരു മാസം മൂന്ന് ദിവസത്തെ ശമ്പളം എന്ന രീതിയില് 10 മാസംകൊണ്ടാണ് തുക പിടിച്ചത്. എന്നാല് ഇതില് 10.23 കോടി രൂപ മാത്രമാണ് ദുരിതാശ്വാസ നിധിയിലേയ്ക്ക് ഇതുവരെ നല്കിയത്. ബാക്കി 126 കോടി രൂപയോളം കെഎസ്ഇബി ദുരിതാശ്വാസ നിധിയിലേയ്ക്ക് നല്കാന് ബാക്കിയാണ്.
ഓരോ മാസവും പിടിക്കുന്ന തുക അതാത് മാസം തന്നെ ദുരിതാശ്വാസ നിധിയിലേയ്ക്ക് നല്കുക എന്നതാണ് സാധാരണയുള്ള രീതി. എന്നാല് കെഎസ്ഇബി അത് ഇതുവരെ പാലിച്ചിട്ടില്ല.
സാമ്പത്തിക പ്രതിസന്ധി മൂലമാണ് അത് സാധിക്കാതിരുന്നതെന്നാണ് കെഎസ്ഇബി ചെയര്മാന് പറയുന്നത്. അതേസമയം, സാലറി ചലഞ്ചിന് മുന്പു തന്നെ 50 കോടി രൂപ കെഎസ്ഇബി ദുരിതാശ്വാസ നിധിയിലേയ്ക്ക് നല്കിയിരുന്നെന്നും എന്.എസ് പിള്ള പറഞ്ഞു.
വാട്ടര് അതോറിറ്റി കെഎസ്ഇബിക്ക് 1500 കോടി രൂപ നല്കാനുണ്ട്. ഇത് നാല് ഗഡുക്കളായി നല്കാനാണ് സര്ക്കാര് തീരുമാനിച്ചിരിക്കുന്നത്. ഈ തുകയില് കെഎസ്ഇബി ദുരിതാശ്വാസ നിധിയിലേയ്ക്ക് നല്കാനുള്ള തുക തട്ടിക്കിഴിക്കാനാണ് ഉദ്ദേശിക്കുന്നതെന്ന് കെഎസ്ഇബി പറയുന്നു.
സംഭവം പ്രശ്നമായതോടെ സാലറി ചലഞ്ചില് ജീവനക്കാരില് നിന്നും പിടിച്ച തുക എത്രയും പെട്ടെന്നുതന്നെ മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് കൈമാറുമെന്ന് കെഎസ്ഇബി അറിയിച്ചു.