വാഷിംങ്ടണ്: പ്രധാനമന്ത്രി നരേന്ദ്രമോദിയെ വരവേല്ക്കാന് ഇന്ത്യന്-അമേരിക്കന് സമൂഹം ഹൂസ്റ്റണില് സംഘടിപ്പിക്കുന്ന ‘ഹൗഡി മോദി’ പരിപാടിയില് അമേരിക്കന് പ്രസിഡന്റ് ഡൊണാള്ഡ് ട്രംപ് പങ്കെടുക്കുമെന്ന് വൈറ്റ് ഹൗസ് വൃത്തങ്ങള് സ്ഥിരീകരിച്ചു. ട്രംപ് പങ്കെടുക്കുന്ന വിവരം ഞാറാഴ്ചയാണ് വൈറ്റ് ഹൗസ് അറിയിച്ചത്. സെപ്റ്റംബര് 22ന് നടക്കുന്ന ചടങ്ങില് ട്രംപ് പങ്കെടുക്കുമെന്നും ഹൗഡി മോദി ചടങ്ങ് ആയിരക്കണക്കിന് ആളുകളെ ആകര്ക്ഷിക്കുമെന്നും വൈറ്റ് ഹൗസ് സെക്രട്ടറി അറിയിച്ചു.
സെപ്റ്റംബര് 22 ന് എന്.ആര്.ജി സ്റ്റേഡിയത്തില് നടക്കുന്ന ചടങ്ങില് 50,000 ത്തോളം പേര് പങ്കെടുക്കുമെന്നാണ് റിപ്പോര്ട്ട്. പരിപാടിയില് നിയമജ്ഞരെ കൂടാതെ കോണ്ഗ്രസ് നേതാക്കള്, സെനറ്റ് പ്രതിനിധികള്, വിവിധ സംസ്ഥാനങ്ങളിലെ ഗവര്ണര്മാരും പങ്കെടുക്കും.
2014-ല് അധികാരം ഏറ്റതിനു ശേഷം പ്രധാനമന്ത്രി അമേരിക്കന് സമൂഹത്തെ അഭിസംബോധന ചെയ്യുന്ന മൂന്നാമത്തെ പരിപാടിയാണ് ഹൂസ്റ്റണില് നടക്കുക. 2014-ല് ന്യൂയോര്ക്കിലെ മാഡിസണ് സ്വകയറിലും, 2016-ല് സിലിക്കണ് വാലിയിലുമാണ് നേരത്തെ പ്രധാനമന്ത്രി പങ്കെടുത്ത പരിപാടികള്. രണ്ട് പരിപാടിയിലും ഏകദേശം 20,000 പേരാണ് പങ്കെടുത്തത്.