കൊച്ചി: ശബരിമലയില് ആചാര ലംഘനം നടത്താന് എത്തിയ തൃപ്തി ദേശായി ഉള്പ്പെടെയുള്ള ആക്ടിവിസ്റ്റുകളെ ഉടന് മടക്കി അയക്കണമെന്ന് ശബരിമല കര്മ്മ സമിതി.
യുവതികളെ സന്നിദ്ധാനത്തേക്ക് കടത്തി വിടില്ലെന്ന് സര്ക്കാര് പറയുമ്പോഴും ആക്ടിവിസ്റ്റുകളെ പിന്തിരിപ്പിച്ച് മടക്കി അയക്കാന് പോലീസിന്റെ ഭാഗത്തു നിന്നും ഒരു നീക്കവും ഉണ്ടാകുന്നില്ലെന്ന ആശങ്ക ഭക്തജനങ്ങള്ക്ക് ഉണ്ടായിട്ടുണ്ടെന്നും കര്മ്മ സമിതി വാര്ത്താക്കുറിപ്പില് വ്യക്തമാക്കി.
വിഷയത്തിന്റെ ഗൗരവം മനസിലാക്കി എത്രയും പെട്ടന്ന് ആക്ടിവിസ്റ്റുകളെ മടക്കി അയക്കാന് കേരള സര്ക്കാരും പോലീസും തയ്യാറാകണം. മടങ്ങിപ്പോകാന് തയ്യാറാകുന്നില്ലെങ്കില് ക്രമസമാധാന ലംഘനത്തിന് ഇടയാക്കുന്ന അവരെ അറസ്റ്റ് ചെയ്ത് വേണ്ട നിയമനടപടികള് സ്വീകരിക്കണം. ശബരിമലയിലും സംസ്ഥാനത്തും നിലനില്ക്കുന്ന സമാധാനപരമായ അന്തരീക്ഷത്തിന് ഭംഗം വരാതെ കാത്തുസൂക്ഷിക്കുന്നതിന് കേരള സര്ക്കാരിനും ബാദ്ധ്യതയുണ്ടെന്ന കാര്യവും കര്മ്മ സമിതി ഓര്മ്മിപ്പിച്ചു.
അതെസമയം, ശബരിമലയിലും സംസ്ഥാനത്തും സമാധാനപരമായ അന്തരീക്ഷം സൃഷ്ടിക്കുന്നതിന് പൂര്ണ്ണമായി സഹകരിക്കുമെന്നും ഏത് സാഹചര്യത്തിലും പൂര്ണ്ണമായും സംയമനം പാലിച്ചുകൊണ്ട് സമാധാനപരമായ മാര്ഗ്ഗത്തില് തന്നെ ആയിരിക്കും പ്രതികരിക്കുക എന്നും കര്മ്മ സമിതി വ്യക്തമാക്കി. ആക്ടിവിസ്റ്റുകളെ മടക്കി അയക്കാന് ആവശ്യമായ നടപടികള് സ്വീകരിക്കാത്ത പക്ഷം കാര്യങ്ങള് വഷളാകുമെന്നും കര്മ്മ സമിതി മുന്നറിയിപ്പ് നല്കിയിട്ടുണ്ട്.
ശബരിമല തീര്ത്ഥാടനം വളരെ ശാന്തവും സമാധാനപരവുമായ അന്തരീക്ഷത്തില് നടന്നുവരുന്ന സാഹചര്യത്തില് ഭക്തജനങ്ങളെ വെല്ലുവിളിച്ചു കൊണ്ട് പല ആക്ടിവിസ്റ്റുകളും ആചാരലംഘനത്തിന് ശ്രമിക്കുന്നതിന് പിന്നില് കൃത്യമായും ഒരു ഗൂഢാലോചനയുണ്ട്. ഇത് അന്വേഷിക്കണം. ഇനിയും ഇത്തരം സംഭവങ്ങള് ആവര്ത്തിക്കാതിരിക്കാന് വേണ്ട മുന്കരുതലുകള് എടുക്കാന് കേരള സര്ക്കാരും പോലീസും തയ്യാറാകണമെന്നും കര്മ്മ സമിതി ആവശ്യപ്പെട്ടു.