ന്യൂഡല്ഹി; ഇന്ത്യാ പാക് അതിര്ത്തിയില് പാക് ഡ്രോണ് കണ്ടെത്തി.തിങ്കളാഴ്ച രാത്രിയാണ് പഞ്ചാബിലെ ഫിറോസ്പൂരിലെ ഇന്തോ-പാക് അതിര്ത്തിയില് പാകിസ്ഥാനില് നിന്നുള്ള ഒരു ഡ്രോണ് കണ്ടെത്തിയത്.രാത്രി 8.40 ഓടെ, തെണ്ടിവാല ഗ്രാമത്തിലെ ഇന്ത്യന്
വ്യോമാതിര്ത്തിയില് ആയിരുന്നു ഡ്രോണ് കണ്ടെത്തിയത്. അഞ്ചുമിനിറ്റെങ്കിലും ഇത് പ്രദേശത്ത് നിരീക്ഷണം നടത്തിയതായാണ് റിപ്പോര്ട്ട്. ബിഎസ്എഫ് ഉദ്യോഗസ്ഥര് വെടിവയ്ക്കാന് ശ്രമം നടത്തിയെങ്കിലും വിജയിച്ചില്ല. പിന്നീട് ഡ്രോണ് അപ്രത്യക്ഷമായെന്നും ഉദ്യോഗസ്ഥര് പറഞ്ഞു.
പ്രദേശത്തെ എല്ലാ സുരക്ഷാ ഏജന്സികളോടും അതീവ ജാഗ്രത പാലിക്കാന് മുതിര്ന്ന സൈനിക ഉദ്യോഗസ്ഥര് നിര്ദ്ദേശം നല്കിയിട്ടുണ്ട്. റിപ്പബ്ലിക് ദിനാഘോഷത്തോടനുബന്ധിച്ച് ഇന്ത്യയില് ആക്രമണം നടത്താന് ഭീകരര് പദ്ധതിയിടുന്നതായി റിപ്പോര്ട്ടുകളുണ്ട്. അതിര്ത്തിയില് ഏകദേശം മുന്നൂറു ഭീകരരെങ്കിലും ഇന്ത്യയിലേക്ക് നുഴഞ്ഞു കയറാന് ശ്രമം നടത്തുന്നതായാണ് രഹസ്യാന്വേഷണ വിഭാഗം പുറത്തുവിടുന്ന റിപ്പോര്ട്ടുകളില് നിന്ന് വ്യക്തമാകുന്നത്.