കോഴിക്കോട്: കുന്ദമംഗലത്ത് വൻ കഞ്ചാവ് വേട്ട. 10 കിലോ കഞ്ചാവുമായി ഒരാൾ പിടിയിലായി. കോഴിക്കോട് ആരാമ്പ്രം സ്വദേശിയായ പടനിലം പുള്ളിക്കോത്ത് മാഞ്ഞോറമ്മൽ ഇസ്മയിൽ ആണ് പോലീസിന്റെ പിടിയിലായത്. സംസ്ഥാന പോലീസ് മേധാവിയുടെ മേൽനോട്ടത്തിൽ ജില്ലാ അടിസ്ഥാനത്തിൽ രൂപീകരിച്ച ഡാൻസാഫ് സ്ക്വാഡിന്റെ നേതൃത്ത്വത്തിൽ നടത്തിവരുന്ന പ്രത്യേക ഓപ്പറേഷന്റെ ഭാഗമായാണ് ഇയാൾ പിടിയിലായത്.
കോഴിക്കോട് ജില്ല പോലീസ് മേധാവി എ വി ജോർജ്ജ് IPS ന്റെ നിർദ്ദേശത്തെത്തുടർന്ന് നാർകോട്ടിക് സെൽ അസി.കമ്മീഷണർ പി.സി ഹരിദാസിന്റെ നേതൃത്വത്തിലുള്ള ഡിസ്ട്രിക്ക് ആന്റി നാർക്കോട്ടിക്ക് സ്പെഷ്യൽ ആക്ഷൻ ഫോഴ്സും (ഡൻസാഫ്) കുന്ദമംഗലം സബ്ബ് ഇൻസ്പെക്ടർ ശ്രീജിത്തിന്റെ നേതൃത്വത്തിലുള്ള കുന്നമംഗലം പോലീസും ചേർന്ന് നടത്തിയ ആസൂത്രിത നീക്കത്തിലാണ് ഇസ്മയിൽ പിടിയിലായത്.
പതിവ് പട്രോളിങ്ങിനിടെ ആരാമ്പ്രത്ത് വെച്ച് പോലീസിനെ കണ്ട് വെട്ടിച്ച് പോകാൻ ശ്രമിച്ച ഇസ്മായിലിനെ സാഹസികമായി പോലീസ് കീഴ്പ്പെടുത്തുകയായിരുന്നു. ഇസ്മായിലിന്റെ രീതികളെല്ലാം മനസ്സിലാക്കിയിരുന്ന പോലീസ് തെളിവുകളുടെ അടിസ്ഥാനത്തിൽ നടത്തിയ ശാസ്ത്രീയമായ ചോദ്യം ചെയ്യലിൽ ആന്ധ്രയിൽ നിന്നെത്തിച്ച ബാക്കി കഞ്ചാവ് കല്ലുംപുറത്തുള്ള വാടക വീട്ടിൽ സൂക്ഷിച്ചതായി ഇയാൾ പോലീസിനോട് സമ്മതിക്കുയായിരുന്നു. തുടർന്ന് പോലീസ് നടത്തിയ റെയ്ഡിൽ 8 കിലോയിലധികം കഞ്ചാവ് ഇയാളുടെ വാടക വീട്ടിൽ നിന്നും കണ്ടെടുക്കുകയായിരുന്നു.
