തിരുവനന്തപുരം: ആരോഗ്യ സുരക്ഷാ ക്രമീകരങ്ങളോടെ എസ്എസ്എല്സി, ഹയര് സെക്കണ്ടറി പരീക്ഷകള്ക്ക് നാളെ തുടക്കമാകും. എല്ലാ പരീക്ഷ കേന്ദ്രങ്ങളിലും ആരോഗ്യ പ്രവര്ത്തകരുടെ സാന്നിധ്യവും തെര്മല് സ്കാനറും ഉറപ്പാക്കാന് ആരോഗ്യവകുപ്പ് നിര്ദേശിച്ചിട്ടുണ്ട്. പതിമൂന്നരലക്ഷം വിദ്യാര്ത്ഥികളാണ് നാളെ പരീക്ഷ എഴുതുന്നത്.
അനിശ്ചിതത്വങ്ങള്ക്കൊടുവിലാണ് മാറ്റിവെച്ച പരീക്ഷകള് നാളെ പുനരാരംഭിക്കുന്നത്. 2945 കേന്ദ്രങ്ങളിലാണ് എസ്എസ്എല്സി പരീക്ഷ. 2032 കേന്ദ്രങ്ങള് ഹയര്സെക്കന്ഡറിക്കും 389 കേന്ദ്രങ്ങള് വിഎച്ച്എസ്സിക്കും ഉണ്ട്. മാസ്ക്,സാനിറ്റൈസര്,തെല്മല് സ്കാനര് ഉള്പ്പടെയുളള സുരക്ഷ ഒരുക്കിയാണ് വിദ്യാര്ത്ഥികളെ ക്ലാസിലേക്ക് പ്രവേശിപ്പിക്കുക. വിദ്യാര്ത്ഥികളുടെ തെര്മല് സ്കാനിംഗ് നടത്തും. പനി പോലെ രോഗലക്ഷണങ്ങള് ഉണ്ടെങ്കില് അവരെ പ്രത്യേക മുറിയിലിരുത്തും. ആരോഗ്യവകുപ്പിന്റെ രണ്ട് ഫീല്ഡ് ലെവല് ഹെല്ത്ത് കെയര് വര്ക്കര്മാര് പരീക്ഷാ കേന്ദ്രങ്ങളിലുണ്ടാകും. പരീക്ഷാ കേന്ദ്രത്തിലെ ഇരിപ്പിടങ്ങളുടെ ക്രമീകരണം സീറ്റുകള്ക്കിടയില് 1.5 മീറ്റര് അകലത്തിലായിരിക്കണമെന്ന് നിര്ദേശിച്ചിട്ടുണ്ട്. സ്കൂളില് എത്താന് ബുദ്ധിമുട്ടുള്ള കുട്ടികളുടെ യാത്ര സൗകര്യങ്ങളും ഒരുക്കിയിട്ടുണ്ട്.
വിദ്യാര്ത്ഥികള് പേനകള്, ഇന്സ്ട്രുമെന്റ് ബോക്സ് തുടങ്ങിയവയൊന്നും കൈമാറ്റം ചെയ്യരുത്. ലക്ഷദ്വീപില് നിന്നും മറ്റ് സംസ്ഥാനങ്ങളില് നിന്നും വരുന്ന വിദ്യാര്ത്ഥികള്ക്ക് പ്രത്യേക പരീക്ഷാ കേന്ദ്രങ്ങളോ, പരീക്ഷാ കേന്ദ്രങ്ങളില് പ്രത്യേക ക്ലാസ് മുറികളോ അനുവദിക്കണമെന്ന് നിര്ദേശം നല്കിയിട്ടുണ്ട്. പതിനായിരത്തിലധികം വിദ്യാര്ത്ഥികള് പരീക്ഷാ കേന്ദ്രം മാറ്റാന് അപേക്ഷ നല്കിയിട്ടുണ്ട്. പരീക്ഷക്കെത്താനാവാതെ വരുന്നവര്ക്ക് സേ പരീക്ഷക്കൊപ്പം റഗുലര് പരീക്ഷ എഴുതാം.