മലപ്പുറം: മലപ്പുറം ജില്ലയില് അഞ്ച് പേര്ക്ക് കൂടി കൊറോണ സ്ഥിരീകരിച്ചു. രോഗബാധ സ്ഥിരീകരിച്ചവര് വിവിധ വിദേശ രാജ്യങ്ങളില് നിന്നെത്തിയവരാണ്. ജില്ലയില് പുതുതായി ആര്ക്കും സമ്പര്ക്കത്തിലൂടെ രോഗബാധയുണ്ടായിട്ടില്ല. പുതുതായി രോഗബാധ സ്ഥിരീകരിച്ചവരെല്ലാം ജില്ലയിലെ മഞ്ചേരി ഗവ. മെഡിക്കല് കോളജ് ആശുപത്രിയില് ചികിത്സയിലാണ്.
ജൂണ് 11 ന് കുവൈത്തില് നിന്ന് കൊച്ചി വഴി തിരിച്ചെത്തിയ മലപ്പുറം പൈത്തിനിപറമ്പ് സ്വദേശി 49 വയസുകാരന്, ജൂണ് 12 ന് ദുബായില് നിന്ന് കരിപ്പൂര് വഴി തിരിച്ചെത്തിയ വളാഞ്ചേരി ഇരിമ്പിളിയം സ്വദേശി 34 വയസുകാരന്, കുവൈത്തില് നിന്ന് കൊച്ചി വഴി ജൂണ് 15 ന് തിരിച്ചെത്തിയ വഴിക്കടവ് പഞ്ചായത്തങ്ങാടി സ്വദേശി 48 വയസുകാരന്, റിയാദില് നിന്ന് കരിപ്പൂര് വഴി ജൂണ് 10 ന് തിരിച്ചെത്തിയ മൂത്തേടം നമ്പൂരിപൊട്ടി കല്ക്കുളം സ്വദേശി 48 വയസുകാരന്, ദോഹയില് നിന്ന് കൊച്ചി വഴി ജൂണ് അഞ്ചിന് തിരിച്ചെത്തിയ കുറ്റിപ്പുറം പാഴൂര് പകരനെല്ലൂര് സ്വദേശിയായ 27 കാരന് എന്നിവര്ക്കാണ് രോഗബാധ സ്ഥിരീകരിച്ചത്.
രോഗം സ്ഥിരീകരിച്ചവരുമായി ഏതെങ്കിലും വിധത്തില് സമ്പര്ക്കമുണ്ടായിട്ടുള്ളവര് വീടുകളില് പ്രത്യേക മുറികളില് നിരീക്ഷണത്തില് കഴിയണമെന്ന് ജില്ലാ കളക്ടര് കെ. ഗോപാലകൃഷ്ണന് അറിയിച്ചു. ഈ വിവരം ആരോഗ്യ പ്രവര്ത്തകരെ അറിയിക്കണം. വീടുകളില് നിരീക്ഷണത്തിന് സൗകര്യമില്ലാത്തവര്ക്ക് സര്ക്കാര് ഒരുക്കിയ കൊറോണ കെയര് സെന്ററുകള് ഉപയോഗപ്പെടുത്താം. ആരോഗ്യ പ്രശ്നങ്ങളുണ്ടായാല് ഒരു കാരണവശാലും നേരിട്ട് ആശുപത്രികളില് പോകരുത്. ജില്ലാതല കണ്ട്രോള് സെല്ലില് വിളിച്ച് ലഭിക്കുന്ന നിര്ദ്ദേശങ്ങള് പൂര്ണമായും പാലിക്കണമെന്നും കളക്ടര് പറഞ്ഞു.