തൃശൂര്: ജലനിരപ്പ് ഉയര്ന്നതിനെ തുടര്ന്ന് ഷോളയാര് ഡാം തുറന്നു . വൈകീട്ട് അഞ്ചുമണിക്കാണ് ഡാം തുറന്നത്. കനത്തമഴയെ തുടര്ന്ന് നിലവില് ഡാമിലേക്ക് നീരൊഴുക്ക് ശക്തമാണ്. 2662.75 മീറ്ററാണ് ഡാമിലെ ജലനിരപ്പ്. ഇതിനെ തുടര്ന്നാണ് മുന്കരുതലിന്റെ ഭാഗമായി ഡാമിലെ വെളളം തുറന്നുവിടുന്നത്. അണക്കെട്ടിലെ വെളളം ഒഴുകി എത്തുന്ന ചാലക്കുടി പുഴയുടെ തീരത്തുളളവര് ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു.
അടുത്ത ഞായാറാഴ്ച വരെ സംസ്ഥാനത്ത് വിവിധയിടങ്ങളില് അതിശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്. ഇതിന്റെ ഭാഗമായി വിവിധ ജില്ലകളില് യെല്ലോ അലര്ട്ട് പ്രഖ്യാപിച്ചു.ഒറ്റപ്പെട്ടയിടങ്ങളില് 24 മണിക്കൂറില് 64.5 mm മുതല് 115.5 mm വരെ ലഭിക്കുന്ന ശക്തമായ മഴയാണ് പ്രവചിക്കപ്പെട്ടിരിക്കുന്നത്. ശക്തമായ കാറ്റിനും മഴയ്ക്കും മുന്നറിയിപ്പുള്ള സാഹചര്യത്തില് ഉരുള്പൊട്ടല്, മണ്ണിടിച്ചില് സാധ്യതയുള്ള പ്രദേശങ്ങളില് വസിക്കുന്നവര്, നദിക്കരകളില് താമസിക്കുന്നവര് തുടങ്ങിയവര് പ്രത്യേക ജാഗ്രത പാലിക്കണമെന്നും മുന്നറിയിപ്പില് പറയുന്നു.
ബുധനാഴ്ച കോഴിക്കോട്, കണ്ണൂര്, കാസര്ഗോഡ് ജില്ലകളിലും വ്യാഴാഴ്ച കൊല്ലം, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്, മലപ്പുറം, കോഴിക്കോട്, കണ്ണൂര്, കാസര്ഗോഡ് ജില്ലകളിലും വെള്ളിയാഴ്ച കൊല്ലം, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്, മലപ്പുറം, കോഴിക്കോട്, കണ്ണൂര്, കാസര്ഗോഡ് ജില്ലകളിലും ശനിയാഴ്ച ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലും ഞായറാഴ്ച കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലുമാണ് യെല്ലോ അലര്ട്ട് പ്രഖ്യപിച്ചിരിക്കുന്നത്.
Comments