തിരുവനന്തപുരം : വാട്ട്സ്ആപ്പ് സ്റ്റാറ്റസ് 30 ൽ അധികം പേർ കണ്ടാൽ പണം ലഭിക്കുമെന്ന തരത്തിൽ പ്രചരിക്കുന്ന സന്ദേശം വ്യാജമാണെന്ന് മുന്നറിയിപ്പ് നൽകി കേരള പോലീസ്. സ്റ്റാറ്റസിലൂടെ പണമുണ്ടാക്കാം എന്നത് ഓൺലൈൻ തട്ടിപ്പിനുള്ള ശ്രമമാണ്. ഇത്തരം തട്ടിപ്പുകളിൽ ആളുകൾ വീഴരുതെന്നും പോലീസ് പറയുന്നു.
സ്റ്റാറ്റസിലൂടെ ദിവസവും 500 രൂപ വരെ സമ്പാദിക്കാൻ അവസരം എന്ന രീതിയിൽ വാട്സ് ആപ്പിലൂടെ ധാരാളം സന്ദേശങ്ങൾ ഷെയർ ചെയ്യുന്നത് ശ്രദ്ധയിൽപ്പെട്ടിട്ടുണ്ട്. സ്റ്റാറ്റസിനൊപ്പം നല്കിയിരിക്കുന്ന ലിങ്കില് ക്ലിക്ക് ചെയ്താല് ഒറ്റ പേജുള്ള ഒരു വെബ്സൈറ്റിലേക്കാണ് പോവുക. അതില് നിങ്ങള് വാട്സ്ആപ്പില് ഷെയര് ചെയ്യുന്ന സ്റ്റാറ്റസുകള് 30 ല് കൂടുതല് ആളുകള് കാണാറുണ്ടോ ? എങ്കില് നിങ്ങള്ക്കും ഉണ്ടാക്കാം ദിവസേന 500 രൂപ വരെ നേടാം എന്നാണ് നൽകിയിരിക്കുന്നത്.
പ്രമുഖ ബ്രാന്ഡുകളുടെ പരസ്യങ്ങള് വാട്സ്ആപ്പില് സ്റ്റാറ്റസായി പോസ്റ്റ് ചെയ്താൽ , ഒരു സ്റ്റാറ്റസിന് 10 മുതല് 30 രൂപവരെ ലഭിക്കുമെന്നും വാട്സ്ആപ്പിലൂടെ മാത്രം 500 രൂപ നേടാമെന്നുമാണ് വെബ്സൈറ്റില് അറിയിച്ചിരിക്കുന്നത്. ഇതിൽ രജിസ്റ്റര് ചെയ്യുന്നവരുടെ വിവരങ്ങൾ ആവശ്യപ്പെടുകയും തുടർന്ന് ബാങ്കിംഗ് വിവരങ്ങൾ ശേഖരിച്ച് ബാങ്കിംഗ് തട്ടിപ്പുകൾക്കായി ഉപയോഗിക്കാനുമാണ് സാധ്യത. ഇത്തരം തട്ടിപ്പുകൾക്കെതിരെ ജാഗ്രത പാലിക്കണമെന്നും പോലീസ് ഫേസ്ബുക് പോസ്റ്റിലൂടെ അറിയിച്ചു.
Comments