ഭോപ്പാല്‍: സംസ്ഥാനത്തെ ലൗഹിദിനെതിരെ ശക്തമായ നടപടിയുമായി മദ്ധ്യപ്രദേശ് സര്‍ക്കാര്‍. ലൗജിഹാദ് പ്രതികള്‍ക്ക് ഏറ്റവും കുറഞ്ഞത് അഞ്ചു വര്‍ഷം തടവുശിക്ഷ നല്‍കാനുള്ള ബില്ല് അവതരിപ്പിക്കാനാണ് ശിവരാജ് സിംഗ് ചൗഹാന്‍ മന്ത്രിസഭയുടെ തീരുമാനം. കഴിഞ്ഞ ദിവസം മുഖ്യമന്ത്രിയുടെ പ്രസ്താവനയ്‌ക്ക് പിന്നാലെ സംസ്ഥാന ആഭ്യന്തര വകുപ്പ് മന്ത്രി നരോത്തം മിശ്രയാണ് തീരുമാനം അറിയിച്ചത്.
‘ മദ്ധ്യപ്രദേശ് നിയമസഭയുടെ അടുത്ത സെഷനില്‍ ലൗജിഹാദിനെതിരെ ബില്ല് കൊണ്ടുവരാനാണ് തീരുമാനം. പെണ്‍കുട്ടികളെ തട്ടിയെടുത്ത് മതംമാറ്റുന്നതും, ലൈംഗികമായി പീഡിപ്പിക്കുന്നതും, നിര്‍ബന്ധിത മതംമാറ്റത്തിനുമെതിരെയാണ് ബില്ല് . ഏറ്റവും കുറഞ്ഞത് അഞ്ചു വര്‍ഷത്തെ കഠിന തടവ് പ്രതികള്‍ക്ക് നല്‍കണമെന്നാണ് തീരുമാനം.’ മിശ്ര പറഞ്ഞു.
മതംമാറണമെന്ന് ആഗ്രഹിക്കുന്ന വ്യക്തികള്‍ സ്വമേധയാ ജില്ലാ മജിസ്‌ട്രേറ്റിനെ സമീപിക്കണം. വിവാഹിതരാകാന്‍ സ്വമേധയാ തീരുമാനിക്കുന്നവരും വിവാഹത്തിന് ഒരു മാസം മുന്നേ ജില്ലാ മജിസ്‌ട്രേറ്റിനെ രേഖാമൂലം അറിയിക്കുകയും അനുവാദം വാങ്ങുകയും വേണമെന്നതും നിലവിലെ നിയമമാണെന്നും മിശ്ര അറിയിച്ചു.
ഹരിയാനയിലും ഉത്തര്‍പ്രദേശിലും ലൗജിഹാദിനെ കുറ്റകരമായി പ്രഖ്യാപിച്ച ശേഷം ഇത്തരം നിയമം നടപ്പാക്കാനൊരുങ്ങുന്ന മൂന്നാമത്തെ സംസ്ഥാനമാണ് മദ്ധ്യപ്രദേശ്. മുസ്ലീം സമുദായത്തില്‍പ്പെട്ട യുവാക്കള്‍ ഗൂഢ ലക്ഷ്യത്തോടെ ഹിന്ദുക്കളടക്കമുള്ള മറ്റ് മതസ്ഥരെ കുടുക്കി വിവാഹം കഴിച്ച ശേഷം ഉപേക്ഷിക്കുന്ന സംഭവങ്ങളുടെ പശ്ചാത്തലത്തിലാണ് നീക്കം.
Comments