താമരശേരി ചുരത്തിൽ മണ്ണിടിഞ്ഞു; ഗതാഗത നിയന്ത്രണം ഏർപ്പെടുത്തും

കോഴിക്കോട്: താമരശേരി ചുരത്തിൽ വീണ്ടും മണ്ണിടിഞ്ഞു. നിർമ്മാണം നടക്കുന്ന ഏഴ്, എട്ട് വളവുകളിലാണ് മണ്ണിടിഞ്ഞത്. നിർമ്മാണ പ്രവർത്തനങ്ങൾ നടക്കുന്നതിനാൽ ചുരത്തിൽ നിലവിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്. മണ്ണിടിഞ്ഞ സാഹചര്യത്തിൽ കൂടുതൽ നിയന്ത്രണങ്ങൾ ഏർപ്പെടുത്തിയേക്കും.

മൂന്ന് ദിവസം മുൻപും ചുരത്തിൽ മണ്ണിടിഞ്ഞിരുന്നു. ഈ ഭാഗത്ത് തന്നെയാണ് ഇന്ന് വീണ്ടും മണ്ണിടിഞ്ഞത്. താമരശ്ശേരി ചുരത്തിൽ ഒരു മാസം നീണ്ടുനിൽക്കുന്ന നിർമ്മാണ പ്രവർത്തനങ്ങളാണ് പുരോഗമിക്കുന്നത്.

നിലവിൽ ചുരത്തിൽ ബസുകൾക്കും ഭാരം കയറ്റിയ വാഹനങ്ങൾക്കുമാണ് നിയന്ത്രണം. മണ്ണിടിച്ചിൽ തുടരുന്ന സാഹചര്യത്തിൽ കൂടുതൽ നിയന്ത്രണം ഏർപ്പെടുത്തണമെന്ന് സംസ്ഥാന പൊതുമരാമത്ത് വകുപ്പും അറിയിച്ചു.