എർബിൽ : കുർദിസ്ഥാനിൽ ഐഎസ് കൊടുംകുറ്റവാളി അറസ്റ്റിലായി . കുർദിസ്ഥാൻ മേഖലയുടെ കിഴക്കൻ പ്രവിശ്യയായ ഡീർ ഇസ്-സോറിൽ നിന്ന് ആഭ്യന്തര സുരക്ഷാ സേനയാണ് ഐഎസ് ഭീകരനെ അറസ്റ്റ് ചെയ്തത് . സിറിയൻ ഡെമോക്രാറ്റിക് ഫോഴ്സ് ഇക്കാര്യം സ്ഥിരീകരിച്ചിട്ടുണ്ട്.
കൊലപാതകം ആസൂത്രണം ചെയ്യാനും ഭീകരതയ്ക്കായി പണം കണ്ടെത്താനും ഐ എസ് ചുമതലയേൽപ്പിച്ചിരുന്ന നേതാവാണ് അറസ്റ്റിലായത്. ഇയാളിൽ നിന്ന് ആയുധങ്ങളും ഉപകരണങ്ങളും പിടിച്ചെടുത്തതായി സിറിയൻ ഡെമോക്രാറ്റിക് ഫോഴ്സ് അറിയിച്ചു .
കഴിഞ്ഞ മാസം അവസാനം ഡീർ ഇസ്-സോറിൽ 22 ഐഎസ് ഭീകരരെ എസ്ഡിഎഫ് അറസ്റ്റ് ചെയ്തിരുന്നു. മെയ് അവസാനം, പ്രവിശ്യയിലെ 53 സ്ഥലങ്ങളിലായി 24 ഐഎസ് ഭീകരരെയാണ് അറസ്റ്റ് ചെയ്തത് .
2014 ൽ ഇറാഖിലെയും സിറിയയിലെയും ഭൂരിഭാഗം സ്ഥലങ്ങളുടെയും നിയന്ത്രണം ഐഎസ് പിടിച്ചെടുത്തിരുന്നു . 2019 ഓടെ ഇതിൽ പലതും തിരിച്ചു പിടിച്ചെങ്കിലും ഐഎസ് സാന്നിദ്ധ്യം ഇപ്പോഴും അതിർത്തിയുടെ ഇരുവശങ്ങളിലും, പ്രത്യേകിച്ച് ഡീർ ഇസ്-സോറിൽ, ഭീഷണിയായി തുടരുന്നുണ്ട് .
സിറിയൻ ഡെമോക്രാറ്റിക് ഫോഴ്സ് നിയന്ത്രണത്തിലുള്ള ഗ്രാമീണ കാർഷിക മേഖലകളിലും ഐഎസ് സാന്നിധ്യം ഉണ്ടെന്ന് പെന്റഗൺ ത്രൈമാസ റിപ്പോർട്ടിൽ പറയുന്നു .
Comments