‘ചെന്ന് കയറുന്ന വീട്ടിലെ ജോലിക്കാരിയാക്കാനല്ല, സ്വയംപര്യാപ്തയാക്കാനാണ് പഠിപ്പിക്കേണ്ടത്’: ഹരീഷ് ശിവരാമകൃഷ്ണൻ

കൊച്ചി: ചാനൽ ചർച്ചയ്‌ക്കിടെ മകളെ കുറിച്ച് നടി മുക്ത നടത്തിയ പരാമർശങ്ങൾ വലിയ വിവാദമായിരുന്നു. മകളോടൊപ്പം പങ്കെടുത്ത ചാനൽ പരിപാടിയ്‌ക്കിടെയായിരുന്നു നടിയുടെ പരാമർശം. മകളെ പാചകവും ക്ലീനിങ്ങുമെല്ലാം പഠിപ്പിച്ചിട്ടുണ്ടെന്നും അവൾ മറ്റൊരു വീട്ടിൽ ചെന്ന് കയറേണ്ടതാണെന്നുമാണ് മുക്ത പറഞ്ഞത്. ഇപ്പോൾ വിഷയത്തിൽ പ്രതികരണവുമായി എത്തിയിരിക്കുകയാണ് ഗായകൻ ഹരീഷ് ശിവരാമകൃഷ്ണൻ.

വീട്ടു ജോലി ചെയ്യാൻ തന്റെ മകളോടും പറയാറുണ്ടെന്ന് ഹരീഷ് പറയുന്നു. അത് ചെന്ന് കയറുന്ന’ വീട്ടിലെ ഏതെങ്കിലും പ്രിവിലേജ് മൂത്ത ഒരുത്തന്റെ ജോലിക്കാരിയുടെ തസ്തികയ്‌ക്ക് അപേക്ഷിച്ചു വിജയിക്കാനല്ല. അവളുടെ സ്വയംപര്യാപ്തതയ്‌ക്കാണ്. ആൺകുട്ടികളെയും പെൺകുട്ടികളെയും സ്വയംപര്യാപ്തരാക്കാൻ മാതാപിതാക്കൾ ശ്രമിക്കണം. അല്ലാതെ കാലഹരണപ്പെട്ട ജെൻഡർ റോൾസ് പഠിപ്പിച്ച് പിന്നോട്ടാക്കരുതെന്നും ഹരീഷ് കുറിച്ചു. നടിയുടെ പേരെടുത്ത് പറയാതെയായിരുന്നു വിമർശനം.

ഫേസ്ബുക്ക് കുറിപ്പിന്റെ പൂർണ്ണരൂപം

ഇതെന്റെ മകൾ ആണ് അച്ചു. കഴിച്ചു കഴിഞ്ഞ പാത്രം മോറി വെക്കാനും, ബെഡ്ഷീറ്റ് മടക്കി വെക്കാനും ഒക്കെ പറഞ്ഞു കൊടുത്തിട്ടുണ്ട് ഞങ്ങൾ. ഈ പണി ഒക്കെ ഞങ്ങളും (അവളുടെ അപ്പയും അമ്മയും ) ചെയ്യാറും ഉണ്ട്, വലിയ ആനകാര്യം ഒന്നുമല്ല അത്‌…

പക്ഷെ വർമ സാറേ, ഒരു ചെറിയ കുഴപ്പം ഉണ്ട് – ഇതൊന്നും പറഞ്ഞു കൊടുത്തത് ‘ചെന്ന് കേറുന്ന’ വീട്ടിലെ ഏതെങ്കിലും പ്രിവിലേജ് മൂത്ത ഒരുത്തന്റെ ജോലിക്കാരിയുടെ തസ്തികയ്‌ക്ക് അപേക്ഷിച്ചു വിജയിക്കാൻ അല്ല – അവളുടെ സ്വയം പര്യാപ്തതയ്‌ക്കാണ്.

ആൺകുട്ടികളെയും പെൺകുട്ടികളെയും സ്വയം പര്യാപ്തരാക്കാൻ മാതാപിതാക്കൾ ശ്രമിക്കണം, അല്ലാതെ കാലഹരണപ്പെട്ട gender റോൾസ്
പഠിപ്പിച്ചു റെഗ്രെസ്സ് ചെയ്യിക്കരുത്. അത്രേം maturity എങ്കിലും കാണിക്കണം അച്ഛൻ അമ്മമാർ.