താറുമാറായി ശബരിമല റോഡ്: നവീകരണം ഇഴയുന്നു, മഴകാരണമെന്ന് വിശദീകരണം

പത്തനംതിട്ട: ശബരിമലയിലേക്കുള്ള പ്രധാന റോഡിന്റെ നവീകരണം ഇഴയുന്നു. മണ്ഡലകാലം ആരംഭിക്കാൻ ദിവസങ്ങൾ മാത്രം ശേഷിക്കുമ്പോഴും പ്രധാന റോഡ് പൊട്ടിപ്പൊളിഞ്ഞ് താറുമാറായി കിടക്കുകയാണ്. മഴകാരണമാണ് പുനർനിർമ്മാണം വൈകുന്നതെന്നാണ് അധികൃതർ നൽകുന്ന വിശദീകരണം.

കലഞ്ഞൂർ മുതൽ മണ്ണാറക്കുളത്തി വരെ പലയിടത്തും റോഡ് കുത്തിപ്പൊളിച്ച് ഇട്ടിരിക്കുകയാണ്. പുനലൂർ-മൂവാറ്റുപുഴ റോഡിന്റെ അവസ്ഥയും ശോചനീയമാണ്. അമരവിള- ആര്യങ്കാവ് ചെക് പോസ്റ്റുകൾ കടന്ന് എത്തുന്ന അയൽ സംസ്ഥാനക്കാരായ തീർത്ഥാടകർ ഉൾപ്പെടെ ആശ്രയിക്കുന്ന റോഡാണിത്.

പൊളിക്കാത്ത റോഡിന്റെ ഭാഗങ്ങളിൽ വലിയ കുഴികളുണ്ട്. ജോലികൾ തുടങ്ങിയിട്ട് രണ്ട് വർഷം ആകുന്നെങ്കിലും കാര്യമായ പുരോഗതി നിർമ്മാണ രീതിയിലില്ല. കുമ്പഴ മുതൽ കോന്നി വരെയുള്ള റോഡ് ഒന്നര വർഷമായി അടച്ചിട്ടിരിക്കുകയാണ്. വലിയ ഗതാഗത കുരുക്കാണ് ഈ പ്രദേശങ്ങളിൽ അനുഭവപ്പെടുന്നത്. മണ്ഡലകാലം ആരംഭിക്കുന്നതോടെ ഇത് രൂക്ഷമാകും.