ന്യൂഡല്ഹി: ലുധിയാന സ്ഫോടനത്തില് എന്ഐഎ കേസെടുത്തു. അന്വേഷണത്തിനായി എന്ഐഎ സംഘം ജര്മ്മനിയിലേക്ക് പോകും. ജര്മ്മനിയില് അറസ്റ്റിലായ ജസ്വീന്ദര് സിങ് മുള്ട്ടാനിയെ സംഘം ചോദ്യം ചെയ്യും. സ്ഫോടനത്തിന്റെ മുഖ്യ സൂത്രധാരന് മുള്ട്ടാനിയാണെന്നാണ് ഏജന്സികള് വ്യക്തമാക്കുന്നത്. നിരോധിത വിഘടനവാദി സംഘടനയായ സിഖ് ഫോര് ജസ്റ്റിസിന്റെ അംഗമാണ് ജസ്വീന്ദര് സിങ് മുള്ട്ടാനി. സിഖ് ഫോര് ജസ്റ്റിസ് സ്ഥാപകനായ ഗുര്പത്വന്ത് സിങ് പന്നുവിന്റെ അടുത്ത അനുയായിയാണ് ജസ്വീന്ദര്.
ഈ മാസം 23നാണ് ലുധിയാനയിലെ കോടതി വളപ്പില് സ്ഫോടനം നടന്നത്. കോടതിയിലെ വാഷ്റൂമിലായിരുന്നു സ്ഫോടക വസ്തുക്കള് പൊട്ടിത്തെറിച്ചത്. സ്ഫോടക വസ്തുക്കളുമായെത്തിയ ഗഗന്ദീപ് എന്ന മുന് പോലീസ് ഉദ്യോഗസ്ഥനും ഈ സ്ഫോടനത്തില് മരിച്ചിരുന്നു. ഇയാളെ സര്വീസില് നിന്നും പുറത്താക്കിയതാണ്. മറ്റ് ആറ് പേര്ക്ക് ഗുരുതരമായ പരിക്കുകള് ഏറ്റു. അന്വേഷണത്തിന്റെ ആദ്യഘട്ടത്തില് തന്നെ സ്ഫോടനത്തില് ഭീകര സംഘടനകള്ക്ക് പങ്കുണ്ട് എന്ന സൂചന ലഭിച്ചിരുന്നു. ഖലിസ്ഥാന് ഭീകരരുടെ പങ്കാണ് ഇപ്പോള് പ്രധാനമായും അന്വേഷിക്കുന്നത്.
ഗഗന്ദീപും ജസ്വീന്ദര് സിങ് മുള്ട്ടാനിയും തമ്മില് ബന്ധമുണ്ടായിരുന്നതായി അന്വേഷണസംഘം കണ്ടെത്തിയിട്ടുണ്ട്. സ്ഫോടനത്തിന്റെ ആസൂത്രണം ജര്മ്മനിയില് നടന്നു എന്നാണ് വിവരം. സംഭവത്തില് യുഎപിഎ പ്രകാരം കേസ് രജിസ്റ്റര് ചെയ്യാനും എന്ഐഎ തീരുമാനിച്ചിട്ടുണ്ട്. ലുധിയാനയില് നടന്നത് ഭീകരാക്രമണമാണെന്ന സൂചന മുഖ്യമന്ത്രി ചരണ്ജിത്ത് സിങ് ഛന്നിയും നല്കിയിരുന്നു.
പഞ്ചാബിന് പുറമെ ഡല്ഹിയിലും മുംബൈയിലും ജസ്വീന്ദര് സ്ഫോടനം നടത്താന് പദ്ധതി ഇട്ടിരുന്നതായി വിവരം ലഭിച്ചിട്ടുണ്ട്. പാകിസ്താനില് നിന്നാണ് ഇയാള്ക്ക് സ്ഫോടക വസ്തുക്കള് ലഭിച്ചിരുന്നത്. പഞ്ചാബില് വിഘടനവാദ പ്രവര്ത്തനങ്ങളില് ഏര്പ്പെട്ടിരുന്നവര്ക്ക് സ്ഫോടക വസ്തുക്കള് കൈമാറാന് ഇയാള് ശ്രമിച്ചിരുന്നതായും രഹസ്യാന്വേഷണ ഏജന്സികള്ക്ക് വിവരം ലഭിച്ചിട്ടുണ്ട്. പഞ്ചാബിലെ ഫിറോസ്പൂര്, അമൃത്സര്, തരണ് തരണ് ജില്ലകളില് ഇയാള്ക്കെതിരെ വിവിധ കേസുകളില് എഫ്ഐആര് രജിസ്റ്റര് ചെയ്തിട്ടുണ്ട്.
Comments