ഇസ്ലാമാബാദ് : 19-ാമത് സാർക്ക് ഉച്ചകോടിക്ക് ഇസ്ലാമാബാദിൽ ആതിഥേയത്വം വഹിക്കാൻ തയ്യാറാണെന്ന് പാകിസ്താൻ . തിങ്കളാഴ്ച ഇക്കാര്യം ആവർത്തിച്ച് പറഞ്ഞ് പാക് വിദേശകാര്യമന്ത്രി ഷാ മഹമ്മൂദ് ഖുറേഷി ഇന്ത്യയേയും ഉച്ചകോടിയിൽ പങ്കെടുക്കാൻ ക്ഷണിച്ചു.
“19-ാമത് സാർക്ക് ഉച്ചകോടിക്കുള്ള ക്ഷണം ഞാൻ ആവർത്തിക്കുന്നു. ഇന്ത്യ പാകിസ്താനിലേയ്ക്ക് വരാൻ തയ്യാറല്ലെങ്കിൽ,അവർക്ക് വെർച്ച്വൽ രീതിയിലും ഉച്ചകോടിയിൽ പങ്ക് ചേരാം, എന്നാൽ ഉച്ചകോടിയിൽ പങ്കെടുക്കുന്നതിൽ നിന്ന് ഇന്ത്യ മറ്റുള്ളവരെ തടയരുത്,” മഹമ്മൂദ് ഖുറേഷി പറഞ്ഞു.
ഇന്ത്യ സാർക്ക് ഫോറം പ്രവർത്തനരഹിതമാക്കിയെന്നും മഹമ്മൂദ് ഖുറേഷി ആരോപിച്ചു. പാകിസ്താൻ സാർക്ക് ഉച്ചകോടിയെ പ്രാദേശിക സഹകരണത്തിനും വ്യാപാരത്തിനുമുള്ള പ്രധാന ഫോറമായാണ് കണക്കാക്കുന്നതെന്നും ഖുറേഷി പറഞ്ഞു .
പാകിസ്താൻ , അഫ്ഗാനിസ്താൻ, ബംഗ്ലാദേശ്, ഭൂട്ടാൻ, ഇന്ത്യ, മാലിദ്വീപ്, നേപ്പാൾ, , ശ്രീലങ്ക എന്നീ രാജ്യങ്ങൾ ഉൾപ്പെടുന്നതാണ് സൗത്ത് ഏഷ്യൻ അസോസിയേഷൻ ഫോർ റീജിയണൽ കോഓപ്പറേഷൻ (സാർക്ക്). 2014-ൽ കാഠ്മണ്ഡുവിൽ വെച്ചായിരുന്നു അവസാന ഉച്ചകോടി.
2016 നവംബർ 15-19 തീയതികളിൽ ഇസ്ലാമാബാദിൽ സാർക്ക് ഉച്ചകോടി നടത്താൻ പദ്ധതിയിട്ടിരുന്നു. എന്നാൽ “നിലവിലുള്ള സാഹചര്യങ്ങൾ” ചൂണ്ടിക്കാട്ടി ഉച്ചകോടിയിൽ പങ്കെടുക്കാൻ താല്പര്യമില്ലെന്ന് ഇന്ത്യ അറിയിച്ചിരുന്നു. പിന്നാലെ ബംഗ്ലാദേശ്, ഭൂട്ടാൻ, അഫ്ഗാനിസ്ഥാൻ എന്നീ രാജ്യങ്ങളും പാകിസ്താൻ യോഗത്തിൽ പങ്കെടുക്കാൻ വിസമ്മതിച്ചതോടെ ഉച്ചകോടി റദ്ദാക്കേണ്ടി വന്നു.
Comments