കുവൈറ്റ് സിറ്റി: പ്രവാസ ലോകത്തു നിന്ന് ഒരു പുതിയ ദൃശ്യാനുഭവം സമ്മാനിക്കുന്ന ‘യാ കുവൈത്തീ മർഹബ’ സംഗീത ആൽബത്തിന്റെ പോസ്റ്റർ റിലീസ് ചെയ്തു. ഇന്ത്യൻ എംബസിയിൽ നടന്ന ചടങ്ങിൽ അംബാസിഡർ സിബി ജോർജ്ജ് കുവൈത്ത് ടി.വി അവതാരിക മറിയം ഖബന്തിക്ക് പോസ്റ്റർ നൽകിയാണ് റിലീസ് നിർവ്വഹിച്ചത്. കുവൈത്ത് ദേശീയ ദിനാഘോഷത്തിന്റെ ഭാഗമായാണ് ആൽബം നിർമ്മിച്ചത്. 90 ളം കലാകാരന്മാർ അണിനിരന്ന ആൽബത്തിലെ ഗാനങ്ങൾ ചിട്ടപ്പെടുത്തിയിരിക്കുന്നത് അറബി, മലയാളം, ഹിന്ദി ഭാഷകളിലാണ്.
കേരളത്തിലും പരിസര പ്രദേശങ്ങളിലും ചിത്രീകരിച്ച സംഗീത ആൽബത്തിന് ഗാനാലപനത്തിലൂടെ മധുരം നൽകിയത് പ്രശസ്ത ഗായകൻമാരായ മുഹമ്മദ് അഫ്സൽ, ഗിരിചരൻ, സരിത റഹ്മാൻ ,ഹബീബ് മുറ്റിച്ചൂർ , കെ.എസ് രഹ്ന, സിദറത്തുൾ മുന്തറ എന്നീവരാണ് . കെ.ജെ.കോയയും ഹബീബ് മുറ്റിച്ചൂരും സംവിധാനം ചെയ്ത വിഡിയോ ആൽബത്തിന്റെ എഡിറ്റിങ് നിർവഹിച്ചത് ഉസ്മാൻ ഒമറാണ്. ഗാനരചന: ഓ.എം കരുവാരകുണ്ട് . സംഗീതം: കെ.ജെ കോയ.
ക്യാമറ സാബിർ ജാസും, കലാ സംവിധാനം അമ്രാൻ സാംഗിയുമാണ്. ഇന്ത്യൻ എംബസിയിൽ നടന്ന ചടങ്ങിൽ ഫസ്റ്റ് സെക്രട്ടറി ഡോ. വിനോദ് , മുജ്തബ പ്രതിനിധികളായ അഷ്റഫ് ചോറൂട്ട്,യുനുസ് ,അഷറഫ് കണ്ടി, ഫൈസൽ കുറ്റ്യാടി എന്നിവർ പങ്കെടുത്തു.
Comments