രാജ്യത്ത് 5ജി ലേലം ജൂണിൽ നടക്കും, 7.5 ലക്ഷം കോടി രൂപയുടെ മെഗാ ലേലം; സെപ്തംബറോടെ പ്രവർത്തനക്ഷമമായേക്കും

ന്യൂഡൽഹി: വിവര സാങ്കേതിക വിദ്യയുടെ കുതിച്ചു ചാട്ടമായ 5ജി സാങ്കേതിക വിദ്യയ്‌ക്കായി കാത്തിരിക്കുന്ന ഇന്ത്യക്കാരുടെ കാത്തിരിപ്പിന് അവസാനമാകുന്നു. ജൂൺ മാസത്തോടെ 5ജി സ്‌പെക്ട്രം ലേലം വിളിക്കാൻ കേന്ദ്രസർക്കാർ പദ്ധതിയിടുന്നതായാണ് വിവരം. ഇതോടെ രാജ്യത്ത് 5ജി ഓഗസ്റ്റ്- സെപ്തംബർ മാസത്തോടെ ലഭ്യമാകുമെന്നാണ് കണക്കുകൂട്ടുന്നത്.

ഒരു ലക്ഷത്തിലധികം മെഗാഹെർട്‌സ് സ്‌പെക്ട്രത്തിന് 7.5 ലക്ഷം കോടി രൂപയുടെ മെഗാ ലേല പദ്ധതിയാണ് വിഭാവനം ചെയ്തിരിക്കുന്നത്. ടെലികോം റെഗുലേറ്ററി അതോറിറ്റിയുടെ ശുപാർശ ഡിജിറ്റൽ കമ്മ്യൂണിക്കേഷൻസ് കമ്മീഷൻ വിലയിരുത്തുന്നതോടെ ലേല നടപടികളിൽ പുരോഗതിയുണ്ടാകും എന്ന് കേന്ദ്ര ടെലികോം മന്ത്രി അശ്വനി വൈഷ്ണവ് വ്യക്തമാക്കി.

ഒന്നിലധികം ബാൻഡുകളിലായി അടിസ്ഥാന വിലയ്‌ക്ക് 7.5 ലക്ഷം കോടി രൂപയിലധികം വിലമതിക്കുന്ന 1 ലക്ഷം മെഗാഹെർട്‌സ് സ്‌പെക്ട്രം ലേലം ചെയ്യാനാണ് ട്രായ് നിർദേശിച്ചിരിക്കുന്നത്.

4 ജി വേഗതയേക്കാൾ 20 മടങ്ങ് വേഗതയാണ് 5ജി നെറ്റ് വർക്കുകൾ കാഴ്ച വെക്കുക എന്നാണ് ഇതുവരെ പുറത്തു വന്ന റിപ്പോർട്ടുകൾ. 5ജി കണക്റ്റിവിറ്റിയുടെ വരവ് ഇന്റർനെറ്റ് ഉപഭോഗത്തെ മാത്രമല്ല പോത്സാഹിപ്പിക്കുന്നത്. ആരോഗ്യ ഇൻഷൂറൻസ്, ഓട്ടോമൊബൈൽ,വിആർ, എഐ,ഐഒടി, തുടങ്ങിയവയ്‌ക്കും അനുബന്ധ വ്യവസായങ്ങൾക്കുമെല്ലാം 5ജി ഉത്തേജകമാകുമെന്നാണ് വിദഗ്ധർ വ്യക്തമാക്കുന്നത്.