കൊല്ലം: പത്തനാപുരത്ത് ധനകാര്യ സ്ഥാപനത്തിൽ നിന്നും ലക്ഷങ്ങൾ വിലമതിക്കുന്ന സ്വർണവും പണവും കവർന്ന കേസിലെ പ്രതി കീഴടങ്ങി. പാടം സ്വദേശി ഫൈസൽ രാജാണ് പോലീസ് സ്റ്റേഷനിൽ എത്തി കീഴടങ്ങിയത്. കഴിഞ്ഞ മാസമാണ് ഇയാൾ പത്തനാപുരം ബാങ്കേഴ്സ് എന്ന ധനകാര്യ സ്ഥാപനത്തിൽ കവർച്ച നടത്തിയത്.
ഉച്ചയോടെയാണ് ഇയാൾ പോലീസ് സ്റ്റേഷനിൽ എത്തി കീഴടങ്ങിയത്. സംഭവ ശേഷം ഒളിവിൽ പോയ ഇയാൾക്കായി പോലീസ് ഊർജ്ജിത അന്വേഷണം തുടരുകയായിരുന്നു. ഇതിനിടെയാണ് ഇയാൾ കീഴടങ്ങിയത്. മോഷ്ടിച്ച സ്വർണവും പണവും ഇയാളിൽ നിന്നും പോലീസ് കണ്ടെടുത്തിട്ടുണ്ട്. മരത്തിന് മുകളിൽ ആയിരുന്നു ഇയാൾ സ്വർണം ഒളിപ്പിച്ചത്. 38 ലക്ഷം രൂപയുടെ സ്വർണവും നാല് ലക്ഷം രൂപയുമാണ് ഇയാൾ മോഷ്ടിച്ചത്.
ധനകാര്യ സ്ഥാപനത്തിന്റെ പൂട്ട് കുത്തിത്തുറന്ന് ആയിരുന്നു ഇയാൾ അകത്ത് കടന്നത് തുടർന്ന് സ്ട്രോംഗ് റൂമും കുത്തിത്തുറന്ന് ഉരുപ്പടികളും പണവുമായി കടന്നു കളയുകയായിരുന്നു. മോഷണത്തിന് മുൻപ് ഇയാൾ സ്ഥാപനത്തിലെ പൂജാമുറിയിൽ പൂജയും നടത്തിയിരുന്നു.
