തിരുവനന്തപുരം: സംസ്ഥാനത്ത് പ്രിക്കോഷന് ഡോസിനായി പ്രത്യേക യജ്ഞം സംഘടിപ്പിക്കും. ജൂണ് 16 മുതല് വരുന്ന 6 ദിവസങ്ങളിലാണ് പ്രിക്കോഷന് ഡോസിനായി പ്രത്യേക യജ്ഞം സംഘടിപ്പിക്കുന്നത്. ഇക്കാര്യം ആരോഗ്യ വകുപ്പ് മന്ത്രി വീണാ ജോര്ജ് വ്യക്തമാക്കി. വ്യാഴം, വെള്ളി, തിങ്കള്, ചൊവ്വ, വ്യാഴം, വെള്ളി എന്നീ ദിവസങ്ങളിലാണ് പ്രിക്കോഷന് ഡോസ് യജ്ഞം. ഒരു ജില്ലയിലും വാക്സിന് ക്ഷാമമില്ല എന്നും മന്ത്രി വ്യക്തമാക്കി. 60 വയസിന് മുകളിലുള്ള പാലിയേറ്റീവ് കെയര് രോഗികള്, കിടപ്പ് രോഗികള്, വയോജന മന്ദിരങ്ങളിലുള്ളവര് എന്നിവര്ക്ക് പ്രിക്കോഷന് ഡോസ് വീട്ടിലെത്തി നല്കുമെന്നും മന്ത്രി അറിയിച്ചു. ആരോഗ്യ വകുപ്പിന്റെ ഉന്നതതല യോഗത്തിലാണ് മന്ത്രി നിര്ദേശം നല്കിയത്. സംസ്ഥാനത്ത് കൊറോണ കേസുകള്ളുടെ എണ്ണം വർദ്ധിക്കുന്ന സാഹചര്യത്തിൽ കൃത്യമായി മാസ്ക് ധരിക്കേണ്ടതാണെന്നും മന്ത്രി വ്യക്തമാക്കി.
ആഴ്ചയിലെ സ്ഥിതിവിവര കണക്കുകള് പരിശോധിച്ചപ്പോള് എറണാകുളം, തിരുവനന്തപുരം, കോട്ടയം, കോഴിക്കോട്, തൃശൂര് ജില്ലകളിലാണ് കേസുകള് കൂടുതല്. എല്ലാ ജില്ലകളും പ്രത്യേകം ശ്രദ്ധിക്കാന് മന്ത്രി നിര്ദേശം നല്കി. പകര്ച്ചവ്യാധി പ്രതിരോധത്തിന് സൂപ്പര്വൈസറി പരിശോധനകള് കൃത്യമായി നടത്തണം. ഫീല്ഡ് പ്രവര്ത്തനങ്ങള് ശക്തമാക്കാനും നിര്ദേശം നല്കി. ഒമിക്രോണിന്റെ വകഭേദമാണ് കാണുന്നത്. ഒമിക്രോണ് വകഭേദത്തിന് രോഗ തീവ്രത കുറവാണെങ്കിലും പെട്ടന്ന് പകരാന് സാധ്യതയുണ്ട്. രണ്ട് ഡോസ് വാക്സിന് എടുത്തെന്നു കരുതി പ്രിക്കോഷന് ഡോസെടുക്കാതിരിക്കരുതെന്നും നിർദ്ദേശമുണ്ട്.
വാക്സിന് എടുക്കാനുള്ള മുഴുവന് പേരും വാക്സിന് എടുക്കണമെന്നും, രണ്ടാം ഡോസ് വാക്സിനെടുക്കാനുള്ളവരും പ്രിക്കോഷന് ഡോസ് എടുക്കാനുള്ളവരും ഉടന് തന്നെ വാക്സിനെടുക്കേണ്ടതാണെന്നും ആരോഗ്യമന്ത്രി അറിയിച്ചു. 18 വയസ് മുതലുള്ള 88 ശതമാനം പേരാണ് രണ്ടാം ഡോസ് വാക്സിനെടുത്തത്. 22 ശതമാനം പേരാണ് പ്രിക്കോഷന് ഡോസ് എടുത്തത്. 15 മുതല് 17 വയസുവരെയുള്ള 84 ശതമാനം കുട്ടികള്ക്ക് ആദ്യ ഡോസും 56 ശതമാനം കുട്ടികള്ക്ക് രണ്ടാം ഡോസും നല്കിയിട്ടുണ്ട്. 12 മുതല് 14 വയസുവരെയുള്ള 59 ശതമാനം കുട്ടികള്ക്ക് ആദ്യ ഡോസ് വാക്സിനും 20 ശതമാനം കുട്ടികള്ക്ക് രണ്ടാം ഡോസും നല്കിയിട്ടുണ്ട്. 12 വയസിന് മുകളിലുള്ള എല്ലാ കുട്ടികള്ക്കും വാക്സിന് നല്കേണ്ടതാണെന്നും മന്ത്രി അഭ്യര്ത്ഥിച്ചു.
Comments