വാഷിംഗ്ടൺ : പ്രപഞ്ചത്തിന്റെ വിദൂരവും ഏറ്റവും ആഴമേറിയതുമായ ചിത്രങ്ങൾ പുറത്തുവിട്ട് നാസ. ജെയിംസ് വെബ് ദൂരദർശിനി ഉപയോഗിച്ച് പകർത്തിയ വിചിത്രമായ ചിത്രങ്ങളാണ് അമേരിക്കൻ പ്രിസഡന്റ് ജോ ബൈഡൻ പങ്കുവെച്ചത്. ഇൻഫ്രാറെഡിൽ ഇതുവരെ നിരീക്ഷിച്ചിട്ടുള്ളതിൽ വെച്ച് ഏറ്റവും മങ്ങിയ ആയിരക്കണക്കിന് തരംഗങ്ങളാണ് ജെയിംസ് വെബ് ദൂരദർശിനിയിൽ പതിഞ്ഞത്.
ബഹിരാകാശം മനോഹരവും ഇരുണ്ടതും ആഴമേറിയതുമാണ്. പ്രപഞ്ചത്തിൽ ഇതുവരെ എടുത്തിട്ടുള്ളതിൽ വച്ച് ഏറ്റവും ആഴത്തിലുള്ള ഇൻഫ്രാറെഡ് ചിത്രമാണ് ഇത് എന്ന് SMACS 0723 എന്ന ഗാലക്സികളുടെ ചിത്രം പങ്കുവെച്ചുകൊണ്ട് നാസ അറിയിച്ചു. പ്രപഞ്ചത്തിന്റെ ഇതുവരെയുള്ള ചിത്രങ്ങളിൽ വെച്ച് ഏറ്റവും വ്യക്തമായ ചിത്രമാണ് ഇതെന്നാണ് നാസ അഡ്മിനിസ്ട്രേറ്റർ ബിൽ നെൽസൺ അവകാശപ്പെടുന്നത്.
ചിത്രത്തിൽ കാണുന്ന വാലുകളുള്ള നക്ഷത്രങ്ങൾ നമ്മുടെ ഗ്യാലക്സിയിലേതാണ്. അതിനോടൊപ്പം ആയിരക്കണക്കിന് വേറെ നക്ഷത്രങ്ങളും കാണാം. ആകാശത്തിലെ ഒരു മണൽത്തരിയോളം പോന്ന ഇടത്തിൽ നിന്ന് പ്രപഞ്ചത്തിലേക്ക് നോക്കുമ്പോൾ കാണുന്ന ചിത്രങ്ങളാണിതെന്ന് ബിൽ നെൽസൺ വ്യക്തമാക്കി.
ചില നക്ഷത്രങ്ങൾ പൊട്ടിത്തെറിക്കുന്ന ദൃശ്യങ്ങളും നാസ പങ്കുവെച്ചിട്ടുണ്ട്. പൊടിപടലങ്ങളാൽ മൂടപ്പെട്ട പൊട്ടിത്തെറിക്കുന്ന ഒരു ആകാശ നക്ഷത്രത്തിന്റെ ദൃശ്യങ്ങളും സ്പേസ് ഏജൻസി പങ്കുവെച്ചു.
ആദ്യമായിട്ടാണ് ഈ ഗ്യാലക്സിയുടെ ചിത്രങ്ങൾ മനുഷ്യനിർമ്മിത വസ്തുക്കളാൽ കാണാൻ സാധിക്കുന്നത്. 4.6 ബില്യൺ വർഷങ്ങൾക്ക് മുൻപാണ് ഈ ഗ്യാലക്സി രൂപംകൊണ്ടത് എന്നാണ് നിഗമനം. 13 ബില്യൺ വർഷങ്ങൾക്ക് മുൻപുള്ള പ്രപഞ്ചത്തെപ്പറ്റിയുള്ള പഠനത്തിനും ഈ ചിത്രങ്ങൾ സഹായകമാകും.
പന്ത്രണ്ടര മണിക്കൂറെടുത്താണ് ചിത്രങ്ങൾ പകർത്തിയത്. ടെലിസ്കോപ്പിന്റെ നിയർ-ഇൻഫ്രാറെഡ് ക്യാമറ ഉപയോഗിച്ച് പ്രകാശത്തിന്റെ പല തരംഗദൈർഘ്യങ്ങളിൽ വെച്ചാണ് ഈ ചിത്രങ്ങൾ പകർത്തിയത്. തുടർന്ന് ഇവയെല്ലാം യോജിപ്പിച്ചെടുത്തു. ഏറ്റവും വേഗത്തിലും സുതാര്യതയോടെയും പ്രവർത്തിക്കുന്ന ജെയിംസ് വെബ് ടെലിസ്കോപ് ഗ്യാലക്സിയിലെ ഓരോ സൂക്ഷ്മ തരംഗങ്ങളും ഒപ്പിയെടുത്തു.
Comments