ചാന്ദ്രദൗത്യത്തിനൊരുങ്ങി നാസ; ആർട്ടിമിസ് 1 വിക്ഷേപണം ഇന്ന്; യാത്രാപദ്ധതിയിൽ മാറ്റം

റോക്കറ്റ് എഞ്ചിനിലെ സാങ്കേതിക തകരാർ കാരണം മാറ്റിവച്ച നാസയുടെ ചാന്ദ്രദൗത്യം ആർട്ടിമിസ് 1 ഇന്ന് രാത്രി വിക്ഷേപിക്കും. ഇന്ത്യൻ സമയം രാത്രി 11.47നും പുലർച്ചെ 1.47നും ഇടയിലായിരിക്കും വിക്ഷേപണം. കാലാവസ്ഥ അനുകൂലമാണെന്നും, സാങ്കേതിക പ്രശ്‌നങ്ങളെല്ലാം പരിഹരിച്ചുവെന്നും നാസ വ്യക്തമാക്കി. റോക്കറ്റിന്റെ 4 കോർ സ്റ്റേജ് എഞ്ചിനുകളിൽ ഒന്നിൽ സാങ്കേതിക തകരാർ കണ്ടെത്തിയതിനെ തുടർന്നാണ് അവസനാനിമിഷം ദൗത്യം മാറ്റിവച്ചത്. അൻപത് വർഷങ്ങൾക്ക് ശേഷം ചന്ദ്രനിലേക്ക് വീണ്ടും മനുഷ്യരെ എത്തിക്കുന്ന ദൗത്യമാണിത്. ഫ്ളോറിഡയിലെ കെന്നഡി സ്പേസ് സെന്ററിൽ നിന്ന് വിക്ഷേപണം നടത്താനായിരുന്നു തീരുമാനം.

വിക്ഷേപണത്തിന് മുന്നോടിയായി എല്ലാ എഞ്ചിനുകളേയും താഴ്ന്ന താപനിലയിലേക്ക് എത്തിക്കേണ്ടതുണ്ട്. എന്നാൽ ഒരു എഞ്ചിനിൽ മാത്രം ഇത് സാധിച്ചില്ല. ഇത്തവണ കോർ സ്‌റ്റേജിൽ ഹൈഡ്രജൻ നിറച്ചു തുടങ്ങുമ്പോൾ തന്നെ തണുപ്പിൽ ജോലികൾ തുടങ്ങാനാണ് നാസയുടെ തീരുമാനം. 45 മിനിട്ട് സമയം വരെ ഇതുവഴി അധികം ലഭിക്കും. നാസയുടെ വിദഗ്ധ സമിതി വിക്ഷേപണവുമായി മുന്നോട്ട് പോകാൻ അനുമതി നൽകി കഴിഞ്ഞു.

വിക്ഷേപണം വൈകിയതിനാൽ ഒറയോൺ പേടകത്തിന്റെ യാത്രാപദ്ധതിയിലും മാറ്റം വന്നിട്ടുണ്ട്. 42 ദിവസത്തെ യാത്ര 38 ദിവസത്തേക്ക് ചുരുക്കി. ഒക്ടോബർ 11ന് ചന്ദ്രനെ ചുറ്റിയ ശേഷം ഒറയോൺ പേടകം തിരികെ ഭൂമിയിൽ എത്തും. പരീക്ഷണദൗത്യമായതിനാൽ തന്നെ ഈ യാത്രയിൽ മനുഷ്യ യാത്രികർ ഉണ്ടാകില്ല. നാല് പേർക്ക് സഞ്ചരിക്കാവുന്ന പേടകമാണിത്. മൂന്ന് ഡമ്മികളാകും യാത്രക്കാരുടെ സ്ഥാനത്ത് ഉണ്ടാവുക. കാംപോസ്, ഹെൽഗ, സോഹാർ എന്നാണ് ഇവയുടെ പേരുകൾ. ഈ ഡമ്മികളിൽ ഘടിപ്പിച്ചിരിക്കുന്ന സെൻസറുകളിൽ നിന്നുള്ള സിഗ്നലുകളിൽ നിന്നാണ് കൂടുതൽ വിവരങ്ങൾ ശേഖരിക്കുക. ഭൂമിയിലേക്ക് തിരികെ പ്രവേശിക്കുമ്പോൾ 2760 ഡിഗ്രി സെൽഷ്യസ് ചൂട് അതിജീവിക്കണം. മറ്റ് സംവിധാനങ്ങളും കൃത്യമായി പ്രവർത്തിക്കണം. ഇതിൽ പിഴവ് സംഭവിച്ചാൽ അടുത്ത ദൗത്യങ്ങൾ വീണ്ടും നീട്ടി വയ്‌ക്കും.

ഇത് വിജയിക്കുകയാണെങ്കിൽ മാത്രമേ മനുഷ്യരെ അയക്കുകയുള്ളു എന്നാണ് തീരുമാനം. ഈ ദൗത്യം വിജയിച്ചാൽ അടുത്ത ഘട്ടം 2024ലേക്കാണ് തീരുമാനിച്ചിരിക്കുന്നത്. 2024ൽ ചന്ദ്രന് ചുറ്റും യാത്രികർ ഭ്രമണം ചെയ്യും. 2025ൽ അടുത്ത ഘട്ടത്തിൽ സ്ത്രീ യാത്രക്കാരെ ഉൾപ്പെടെ ചന്ദ്രോപരിതലത്തിൽ എത്തിക്കാനും നാസ പദ്ധതി ഇടുന്നു. ചന്ദ്രന്റെ ഭ്രമണപഥത്തിലേക്കുള്ള പ്രവേശനവും തിരിച്ചുള്ള യാത്രയിൽ ഭൗമാന്തരീക്ഷത്തിലേക്കുള്ള തിരിച്ചിറക്കവുമാണ് യാത്രയിലെ ഏറ്റവും വെല്ലുവിളി നിറഞ്ഞ ഘട്ടം. 9300 കോടിയിലധികം യുഎസ് ഡോളർ ചെലവ് വരുന്നതാണ് ആർട്ടിമിസ് പദ്ധതി. ആദ്യ ദൗത്യത്തിന് 400 കോടി യുഎസ് ഡോളറോളം ചെലവ് വരുന്നുണ്ട്.