ഇസ്ലാമബാദ്: പള്ളിയുടെ മേൽക്കൂരയിൽ രഹസ്യമായി സൂക്ഷിച്ച മാരകായുധങ്ങളും വെടിക്കോപ്പുകളും പോലീസ് പിടികൂടി. കറാച്ചിയിലെ ഷാ ഫൈസൽ കോളനിയിൽ സ്ഥിതി ചെയ്യന്ന പള്ളിയിൽ നിന്നുമാണ് ഇവ കണ്ടെടുത്തത്. രഹസ്യ വിവരം ലഭിച്ചതിന്റെ പശ്ചാത്തലത്തിൽ പള്ളിക്കുള്ളിൽ തിരച്ചിൽ നടത്തുകയായിരുന്നു എന്ന് പോലീസ് പറഞ്ഞു.
പള്ളിയിൽ രാത്രി സമയങ്ങളിൽ പരിചയമില്ലാത്ത ചിലർ വന്നു പോകുന്നുണ്ടെന്നും രഹസ്യ യോഗങ്ങൾ ഉൾപ്പെടെ നടക്കുന്നുണ്ടെന്നും നാട്ടുകാർ പറഞ്ഞു. പള്ളി കേന്ദ്രീകരിച്ച് ഭീകര പ്രവർത്തനങ്ങൾ നടക്കുന്നുണ്ടെന്ന അറിയിപ്പിനെ തുടർന്നാണ് പോലീസ് റെയ്ഡ് നടത്തിയത്. മൂന്ന് സബ് മെഷീൻ ഗൺ, ഒരു ലൈറ്റ് മെഷീൻ ഗൺ, രണ്ട് ഷോട്ട് ഗൺ, മൂന്ന് പിസ്റ്റൾ, ഒരു റൈഫിൾ, 500ലധികം വെടി ഉണ്ടകൾ എന്നിവയാണ് പോലീസ് പിടിച്ചെടുത്ത വെടിക്കോപ്പുകൾ.
ആയുധങ്ങൾ വിദഗ്ധമായ പരിശോധനയ്‌ക്ക് ഫോറൻസിക് വിഭാഗത്തിലേക്ക് അയച്ചിട്ടുണ്ടെന്നും ഫലം വന്നതിന് ശേഷം മാത്രമേ കൂടുതലായെന്തെങ്കിലും പറയാൻ സാധിക്കു എന്നും അറിയിച്ചു. സംഭവുമായി ബന്ധപ്പെട്ട് ആരെയും അറസ്റ്റ് ചെയ്തിട്ടില്ലെന്നും പ്രതികൾക്ക് വേണ്ടിയുള്ള തിരച്ചിൽ നടത്തുന്നുണ്ടെന്നും പോലീസ് അധികാരികൾ പറഞ്ഞു.
Comments