അന്ധർക്കുള്ള ടി20 ലോകകപ്പ് : തങ്ങളുടെ ടീമിന് ഇന്ത്യ വിസ നിഷേധിച്ചെന്ന് പാകിസ്താൻ , അന്താരാഷ്‌ട്ര മത്സരങ്ങൾ സംഘടിപ്പിക്കാൻ ഇന്ത്യയെ അനുവദിക്കില്ലെന്ന് ഭീഷണി

ഇസ്ലാമാബാദ് : അന്ധർക്കായുള്ള ടി20 ലോകകപ്പിൽ പങ്കെടുക്കാൻ തങ്ങൾക്ക് ഇന്ത്യ വിസ നിഷേധിച്ചതായി പാകിസ്താൻ ബ്ലൈൻഡ് ക്രിക്കറ്റ് കൗൺസിൽ . ഡിസംബർ 5 ന് ടൂർണമെന്റ് ഇന്ത്യയിൽ ആരംഭിച്ചെങ്കിലും വിസ പ്രശ്‌നങ്ങൾ കാരണം പാകിസ്താന്റെ വരവ് വൈകി. ടൂർണമെന്റിന്റെ ഉദ്ഘാടന ദിവസം പാക് ടീം ദക്ഷിണാഫ്രിക്കയെ നേരിടാനിരുന്നെങ്കിലും അവരുടെ വരവ് വൈകിയതോടെ ആ അവസരവും നഷ്ടപ്പെട്ടു.

“ഡിസംബർ 5 മുതൽ 17 വരെ ഇന്ത്യയിൽ നടക്കുന്ന അന്ധരുടെ ടി20 ലോകകപ്പ് ക്രിക്കറ്റിൽ പങ്കെടുക്കാൻ പാക് ബ്ലൈൻഡ് ക്രിക്കറ്റ് ടീമിന് ഇന്ത്യ വിസ നിഷേധിച്ച കാര്യം നിരാശയോടെ പാകിസ്താൻ ബ്ലൈൻഡ് ക്രിക്കറ്റ് കൗൺസിൽ അറിയിക്കാൻ ആഗ്രഹിക്കുന്നു,” ഇത്തരത്തിലാണ് പാകിസ്തൻ പുറത്തിറക്കിയ പ്രസ്താവന.

2012, 2017 വർഷങ്ങളിൽ ഗ്രീൻ ഷർട്ട്‌സ് റണ്ണറപ്പായി ഫിനിഷ് ചെയ്‌തത് എടുത്തുകാണിച്ചുകൊണ്ട്, ഇന്ത്യയിൽ നടക്കുന്ന ടൂർണമെന്റിൽ പങ്കെടുക്കാൻ പാകിസ്താന് അവകാശമുണ്ടെന്നും പാകിസ്താൻ ബ്ലൈൻഡ് ക്രിക്കറ്റ് കൗൺസിൽ പറയുന്നു.

“രാഷ്‌ട്രീയ പശ്ചാത്തലം” അടിസ്ഥാനമാക്കിയാണ് ഇന്ത്യൻ വിദേശകാര്യ മന്ത്രാലയം പാക് ടീമിന് അനുമതി നിഷേധിച്ചതെന്നും പിബിസിസി പറഞ്ഞു.എല്ലാ ടീമുകൾക്കും ഇവന്റിൽ മത്സരിക്കാൻ തുല്യ അവസരങ്ങൾ നൽകണം.ഈ വിവേചനപരമായ പ്രവൃത്തി ഇനിയുള്ള കളികളിൽ ഗുരുതരമായ പ്രത്യാഘാതങ്ങൾ ഉണ്ടാക്കും, കാരണം ഇനി ഞങ്ങൾ അവർക്കെതിരെ കർശനമായ നടപടിയെടുക്കും, ഭാവിയിൽ അന്താരാഷ്‌ട്ര മത്സരങ്ങൾ സംഘടിപ്പിക്കാൻ ഇന്ത്യയെ അനുവദിക്കില്ല, – എന്നും പാകിസ്താൻ ബ്ലൈൻഡ് ക്രിക്കറ്റ് കൗൺസിൽ പറയുന്നു.