കന്യാകുമാരി: പ്രശസ്തമായ മണ്ടയ്ക്കാട് ഭഗവതി ക്ഷേത്രത്തിലെ മാസികൊട മഹോത്സവത്തിന് കൊടിയേറി. മാസികൊട 14-ന് നടക്കും. കഴിഞ്ഞദിവസം രാവിലെ പ്രത്യേക പൂജകൾക്കുശേഷം 7.30-നും 8.30-നും ഇടയിലുള്ള മുഹൂർത്തത്തിൽ തൃക്കൊടിയേറ്റ് നടന്നു. ക്ഷേത്രതന്ത്രി ശങ്കരനാരായണ അയ്യർ കൊടിയേറ്റ് കർമ്മം നിർവഹിച്ചു.
തെലങ്കാന ഗവർണർ തമിഴിസൈ സൗന്ദരരാജൻ, മന്ത്രിമാരായ ശേഖർബാബു, മനോ തങ്കരാജ്, എം.പി. വിജയ് വസന്ത്, എംഎൽഎ പ്രിൻസ്, ജില്ലാ കളക്ടർ ശ്രീധർ, എസ്.പി. ഹരികിരൺ പ്രസാദ്, ദേവസ്വം റീജണൽ ജോയിന്റ് കമ്മിഷണർ കവിതാ പ്രിയദർശിനി, കന്യാകുമാരി ദേവസ്വം ജോയിന്റ് കമ്മിഷണർ ജ്ഞാനശേഖർ ഉൾപ്പെടെയുള്ളവർ തൃക്കൊടിയേറ്റ് ചടങ്ങിൽ പെങ്കടുത്തു. കൂടാതെ ഹൈന്ദവ സംഘം സംഘടിപ്പിച്ച മതസമ്മേളനം തെലങ്കാന ഗവർണർ തമിഴിസൈ സൗന്ദരരാജൻ ഉദ്ഘാടനം ചെയ്തു.
6 മുതൽ 14 വരെയുള്ള ഉത്സവ ദിവസങ്ങളിൽ വിശേഷ പൂജകളും അഭിഷേകങ്ങളും നടക്കും. രാവിലെയും രാത്രിയും 9.30-ന് ദേവി വെള്ളിപ്പല്ലക്കിൽ എഴുന്നള്ളും. മാർച്ച് 10, വെള്ളിയാഴ്ച രാത്രി 12-ന് ഉത്സവത്തിലെ പ്രധാന ചടങ്ങുകളിൽ ഒന്നായ വലിയ പടുക്ക സമർപ്പണം നടക്കും. 13-ന് രാത്രി 9.30-ന് വലിയ തീവെട്ടി എഴുന്നള്ളത്ത്, 14ന് പുലർച്ചെ ശാസ്താക്ഷേത്രത്തിൽ നിന്ന് കളഭ ഘോഷയാത്ര തിരിക്കും. രാത്രി 9.30ന് ദേവീ എഴുന്നള്ളത്ത്. രാത്രി 12-ന് ഒടുക്ക് പൂജയ്ക്കുള്ള പദാർത്ഥങ്ങൾ പാരമ്പര്യ ആചാരപ്രകാരം ക്ഷേത്രത്തിലേക്ക് എഴുന്നള്ളിക്കും. രാത്രി 1-ന് ഒടുക്ക് പൂജ. മറുകോട മാർച്ച് 21-ന് നടക്കും.
അതേസമയം മണ്ടയ്ക്കാട് ക്ഷേത്ര ഉത്സവത്തോടനുബന്ധിച്ച് കന്യാകുമാരിയിലെ വിവിധ സ്ഥലങ്ങളിൽ നിന്നും തിരുവനന്തപുരത്തിൽ നിന്നും തമിഴ്നാട് ട്രാൻസ്പോർട്ടിന്റെ പ്രത്യേക ബസ് സർവീസുകളും ഉണ്ടായിരിക്കും. ജില്ലാ പോലീസ് മേധാവി ഹരി കിരൺ പ്രസാദിന്റെ നേതൃത്വത്തിൽ 1000 പോലീസ് ഉദ്യോഗസ്ഥരെയാണ് സുരക്ഷയ്ക്കായി നിയോഗിച്ചിട്ടുള്ളത്.
കന്യാകുമാരി ജില്ലയിലെ വിശ്വപ്രസിദ്ധമായ ക്ഷേത്രമാണ് മണ്ടയ്ക്കാട് ഭഗവതി ക്ഷേത്രം. വൈഷ്ണവാംശ ശക്തിയാണ് ഇവിടുത്തെ പ്രതിഷ്ഠ. ശ്രീചക്രത്തിന് മുകളിലുള്ള ഒരു ചിതൽപ്പുറ്റിലാണ് ഭഗവതി കുടിക്കൊള്ളുന്നത്. പതിനഞ്ച് അടിയോളം ഉയരമുള്ള ചിതൽപ്പുറ്റാണ് ഇവിടുത്തെ പ്രധാന പ്രതിഷ്ഠ. ഇത് വളർന്നു കൊണ്ടിരിക്കുകയാണ് എന്നാണ് സങ്കല്പം. ചിതൽപ്പുറ്റിന് മുകളിലായി ചന്ദനത്തടി കൊണ്ടുനിർമിച്ചിട്ടുള്ള ഭഗവതിയുടെ മുഖം കാണാം. ഇതിൽ മണ്ടയ്ക്കാട് അമ്മൻ ദേവി ആദിപരാശക്തി കുടിയിരിക്കുന്നുവെന്നാണ് വിശ്വാസം. മഹാകാളി, മഹാലക്ഷ്മി, മഹാസരസ്വതി എന്നിഭാവങ്ങൾ ഭഗവതിയ്ക്കുണ്ട്. എങ്കിലും ഭദ്രകാളി, മഹാകാളി (ശ്രീ പാർവതി) എന്ന ഭാവം തന്നെയാണ് പ്രധാനം.
Comments