60-ാം വയസ്സിൽ വിരമിച്ച കുങ്കി ആനയ്‌ക്ക് സല്യൂട്ട് നൽകി വനപാലകർ; സമൂഹമാദ്ധ്യമങ്ങളിൽ വൈറലായി വീ‍ഡിയോ

ചെന്നൈ: വിരമിച്ച കുങ്കിയാനയ്‌ക്ക് സല്യൂട്ട് നൽകി വനപാലകർ. തമിഴ്‌നാട്ടിലെ കോഴിക്കാമുത്തി ആന ക്യാമ്പിലാണ് വേറിട്ട സംഭവം നടന്നത്. അറുപതാം വയസിൽ കുങ്കിയാനയായ കലീം വിരമിച്ചപ്പോൾ ഞങ്ങളുടെ കണ്ണുകൾ ഈറനണിഞ്ഞെന്നാണ്
ഐഎഎസ് ഓഫീസറായ സുപ്രിയ സാഹു ട്വിറ്ററിൽ വീഡിയോ പങ്കുവെച്ചു കൊണ്ട് കുറിച്ചത്.

”തമിഴ്‌നാട്ടിലെ കോഴിമുട്ടി ആന ക്യാമ്പിലെ കുങ്കിയാനയായ കലീം 60-ആം വയസ്സിൽ വിരമിച്ചപ്പോൾ ഞങ്ങളുടെ കണ്ണുകളും ഈറനണിഞ്ഞു. 99 രക്ഷാപ്രവർത്തനങ്ങളിൽ ഏർപ്പെട്ട ഈ ആന ഒരു ഇതിഹാസമാണ്. തമിഴ്നാട് വനപാലകർ അദ്ദേഹത്തിന് ഗാർഡ് ഓഫ് ഓണർ നൽകി.” – സുപ്രിയ സാഹു ട്വീറ്റ് ചെയ്തു.

സുപ്രിയ സാഹു പങ്കുവെച്ച വീഡിയോ സമൂഹമാദ്ധ്യമങ്ങളിൽ നിമിഷ നേരങ്ങൾക്കുള്ളിലാണ് വൈറലായത്. നിലവിൽ തമിഴ്നാട്ടിലെ പരിസ്ഥിതി, കാലാവസ്ഥാ വ്യതിയാനം, വനം എന്നിവയുടെ അഡീഷണൽ ചീഫ് സെക്രട്ടറിയാണ് സാഹു. പരിസ്ഥിതി സംരക്ഷണവുമായി ബന്ധപ്പെട്ട് നിരവധി ട്വീറ്റുകൾ ഇവർ പങ്കുവെയ്‌ക്കാറുണ്ട്.

കാടിറങ്ങുന്ന കാട്ടാനകളെ കാട്ടിലേക്ക് തുരത്താൻ പ്രത്യേകം പരിശീലനം ലഭിച്ച ആനകളാണ് കുങ്കിയാനകൾ. കാടിറങ്ങി ജനവാസ മേഖലയിലെ കാര്‍ഷിക വിളകള്‍ നശിപ്പിക്കുകയും മനുഷ്യജീവന് ഭീഷണിയാവുകയും ചെയ്യുന്ന കാട്ടാനകളുടെ ശല്യം അവസാനിക്കുന്നത് കുങ്കിയാനകൾ എത്ത‍ുന്നതോടുകൂടിയാണ്. ഇത്തരത്തിൽ 99 രക്ഷാപ്രവർത്തനങ്ങളിൽ ഏർപ്പെട്ട ആനയാണ് ഇപ്പോൾ വിരമിച്ച കോഴിമുട്ടി ആന ക്യാമ്പിലെ കലീം.

Our eyes are wet and hearts are full with gratitude as Kaleem the iconic Kumki elephant of the Kozhiamuttthi elephant camp in Tamil Nadu retired today at the age of 60. Involved in 99 rescue operations he is a legend. He received a guard of honour from #TNForest #Kaleem pic.twitter.com/bA1lUOQmTw

— Supriya Sahu IAS (@supriyasahuias) March 7, 2023