ഇനി വാഹനങ്ങളുടെ വേഗത കുറഞ്ഞാലും പിഴ!

ഇനി വാഹനങ്ങളുടെ വേഗത കുറഞ്ഞാലും പിഴ അടയ്‌ക്കണമെന്ന് നിർദേശം. അബുദാബി ഷെയ്ഖ് മുഹമ്മദ് ബിൻ റാഷിദ് റോഡിൽ വേ​ഗത കുറച്ച് വാഹനമോടിക്കുന്നവരിൽ നിന്ന് പിഴ ഈടാക്കാനാണ് അബുദാബി പോലീസിന്റെ തീരുമാനം. ശരാശരി വേ​ഗതയായ 120 കിലോമീറ്ററിലും താഴെ വാഹനമോടിച്ചാൽ 400 ദിർഹം പിഴ അടക്കേണ്ടിവരുമെന്ന് അബുദാബി പോലീസ് അറിയിച്ചു.

അബുദാബി ഷെയ്ഖ്​ മുഹമ്മദ്​ ബിൻ റാഷിദ്​ റോഡിലെ രണ്ട്​ വരികളിലാണ്​ ശരാശരി വേഗത 120 കിലോമീറ്ററായി നിശ്​ചയിച്ചത്​. നിയമം പാലിക്കാത്തവർക്കാണ്​ 400 ദിർഹം​ പിഴ. ഏപ്രിൽ ഒന്ന്​ മുതൽ സംവിധാനം നിലവിൽ വരും. നിയമം ലംഘിക്കുന്നവർക്ക്​ അന്നു​ മുതൽ മുന്നറിയിപ്പ്​ നൽകും. മെയ്​ ഒന്ന്​ മുതൽ പിഴ ഈടാക്കി തുടങ്ങുമെന്നും അധികൃതർ അറിയിച്ചു.

ഇടതുവശത്ത്​ നിന്ന്​ ആദ്യത്തെ രണ്ട്​ ലൈനുകളിലാണ്​ ശരാശരി വേഗത 120 കിലോമീറ്ററാക്കിയത്​. വലിയ വാഹനങ്ങൾക്കായി നിശ്ചയിച്ചിരിക്കുന്ന വലതുവശത്തെ ലൈനിലും വലതുവശത്തെ രണ്ടാമത്തെ ലൈനിലും ഈ നിയമം ബാധകമല്ല. എല്ലാ ലൈനുകളിലും പരമാവധി വേഗത മണിക്കൂറിൽ 140 കിലോമീറ്ററായിരിക്കും. വാഹനങ്ങളുടെ സുരക്ഷ മുൻനിർത്തിയാണ്​ വേഗപരിധി നിശ്ചയിക്കുന്നതെന്നും കുറഞ്ഞ വേഗതയിൽ സഞ്ചരിക്കാൻ ആഗ്രഹിക്കുന്നവർ വലതു പാത തിരഞ്ഞെടുക്കണമെന്നും അബുദാബി പോലീസ്​ സെൻട്രൽ ഓപറേഷൻസ്​ വിഭാ​ഗം അറിയിച്ചു.