‘ഇന്ത്യ-കൊറിയ സൗഹൃദ ഗോൾഫ് കപ്പ് 50-ാം വാർഷികം’; വേദിയെ ഇളക്കിമറിക്കാൻ നാട്ടു നാട്ടുവും

ന്യൂഡൽഹി: ഇന്ത്യ-കൊറിയ നയതന്ത്രബന്ധം സ്ഥാപിച്ചതിന്റെ സുവർണ ജൂബിലി വാർഷികം ആഘോഷിക്കുന്നതിന്റെ ഭാഗമായി ‘ഇന്ത്യ-കൊറിയ സൗഹൃദ ഗോൾഫ് കപ്പിന്’ ഇന്ത്യ ആതിഥേയത്വം വഹിക്കും. ഏപ്രിൽ 15-ന് ഹരിയാനയിലെ ഗുരുഗ്രാമിൽ വച്ചാണ് ഗോൾഫ് കപ്പ് നടക്കുക. കൊറിയൻ എംബസിയുടെയും ഇന്ത്യയിലെ യുണൈറ്റഡ് കൊറിയൻ കമ്മ്യൂണിറ്റി അസോസിയേഷന്റെയും പിന്തുണയോടെ സംഘടിപ്പിക്കുന്ന പരിപാടിയിൽ മുതിർന്ന നയതന്ത്രജ്ഞർ, വ്യവസായ പ്രമുഖർ കൊറിയൻ, ഇന്ത്യൻ ഗോൾഫ് താരങ്ങൾ എന്നിവരുൾപ്പെടെ പങ്കെടുക്കും. ഇന്ത്യയിലെ കൊറിയൻ അംബാസഡർ ചാങ് ജെ-ബോക്കും പരിപാടിയിൽ പങ്കുചേരും.

ഇപ്പോഴിതാ ഇന്ത്യ-കൊറിയ സൗഹൃദ ഗോൾഫ് കപ്പിന്റെ അവാർഡ് ദാന ചടങ്ങിൽ ലോകമെമ്പാടും ചരിത്രം സൃഷ്ടിച്ച കൊറിയൻ, ഇന്ത്യൻ ഗാനങ്ങളായ ഗന്നം സ്റ്റൈലും നാട്ടു-നാട്ടുവും അവതരിപ്പിക്കും. ഈ ഗാനങ്ങൾക്ക് അംബാസഡർ ചാങ് ജേ-ബോക്ക് ഉൾപ്പെടെയുള്ളവർ വേദിയിൽ ചുവടുവെയ്‌ക്കും. 2012-ൽ 100കോടി വ്യൂസ് നേടിയ ആദ്യ യൂട്യൂബ് വീഡിയോ എന്ന നിലയിൽ ഗിന്നസ് വേൾഡ് റെക്കോർഡ്് സൃഷ്ടിച്ച ഗാനമായ റാപ്പർ സൈയുടെ ”ഗന്നം സ്‌റ്റൈലും ചരിത്രം സൃഷ്ടിച്ച ഹിറ്റ് തെലുങ്ക് ഭാഷാ ചിത്രമായ ആർആർആറിലെ ഓസ്‌കാർ നേടുന്ന ആദ്യ ഇന്ത്യൻ ചലച്ചിത്രഗാനം നാട്ടു നാട്ടുവും അവതരിപ്പിക്കുന്നതോടെ ചടങ്ങുകൾക്ക് ഏറെ മാറ്റ് കൂടും.