കുപ്രസിദ്ധ ഗുണ്ട ഓട്ടോ ജയൻ പിടിയിൽ; അറസ്റ്റ് യുവാവിനെ വെട്ടിപ്പരിക്കേൽപ്പിച്ചതിന്

തിരുവനന്തപുരം: കുപ്രസിദ്ധ ഗുണ്ടയായ ഓട്ടോ ജയൻ അറസ്റ്റിൽ. തോപ്പിൽ പാലത്തിനു സമീപം തിട്ടയിൽ മുക്കിൽ ഇലഞ്ചിക്കോട് വീട്ടിൽ ഓട്ടോ ജയൻ എന്ന ജയനെയാണ് ചിറയിൻകീഴ് പോലീസ് പിടികൂടിയത്. ചിറയിൻകീഴ്, ആറ്റിങ്ങൽ, കടയ്‌ക്കാവൂർ, വർക്കല, അഞ്ചുതെങ്, കൊട്ടിയം തുടങ്ങി നിരവധി പോലീസ് സ്റ്റേഷനുകളിൽ പ്രതിയാണ് ഇയാൾ.

കൊച്ചാലുമൂട് സ്വദേശിയായ അനസിനെ വെട്ടിപരിക്കേൽപിച്ച കേസിലാണ് അറസ്റ്റ്. ഇക്കഴിഞ്ഞ 11-ാം തീയതി വൈകിട്ട് അഞ്ചരയോടെ ജയന്റെ വീടിന് സമീപത്തു വെച്ച് സുഹൃത്തുമായി സംസാരിച്ചു നിന്ന അനസിനെ അവിടെ വന്നത് എന്തിന് എന്ന് ചോദ്യം ചെയ്തു കൊണ്ടാണ് ജയൻ വെട്ടിപ്പരിക്കേൽപ്പിച്ചത് എന്ന് പോലീസ് പറഞ്ഞു. തലയ്‌ക്കും കൈക്കും പരിക്കേറ്റ അനസിനെ തിരുവന്തപുരം മെഡിക്കൽ കോളേജിൽ പ്രവേശിപ്പിച്ചു. കൃത്യത്തിന് ശേഷം ഒളിവിലായിരുന്നു പ്രതി. ഇന്നലെ ലഭിച്ച രഹസ്യവിവരത്തിന്റെ അടിസ്ഥാനത്തിൽ തിരുവനന്തപുരം മെഡിക്കൽ കോളേജ് പരിസരത്ത് നിന്ന് ചിറയിൻകീഴ് സി.ഐ ജി ബി. മുകേഷിന്റെ നേതൃത്വത്തിലുള്ള പോലീസ് സംഘം ഇയാളെ പിടികൂടുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.