തലസ്ഥാനത്തെ പെട്രോൾ പമ്പ് ആക്രമണം; മുഖ്യപ്രതിയും അറസ്റ്റിൽ

തിരുവനന്തപുരം: ബൈക്കിലെത്തി പെട്രോൾ പമ്പ് ജീവനക്കാരെ ആക്രമിച്ച കേസിൽ മുഖ്യപ്രതി അറസ്റ്റിൽ. തിരുമല പ്ലാവിള തച്ചൻവിളാകത്ത് വീട്ടിൽ ഉണ്ണി എന്ന മഹാദേവനാണ് പിടിയിലായത്. പ്രതിയെ തിരുമല ഭാഗത്ത് നിന്ന് മലയിൻകീഴ് പോലീസാണ് അറസ്റ്റ് ചെയ്തത്. മഹാദേവനെ കോടതിയിൽ ഹാജരാക്കി റിമാൻഡ് ചെയ്തു.

ഇതോടെ അക്രമവുമായി ബന്ധപ്പെട്ട് അഞ്ച് പ്രതികളും പോലീസ് പിടിയിലായി. ബാലരാമപുരം പെരിങ്ങമല തെറ്റിവിളാകത്ത് വാടകക്ക് താമസിക്കുന്ന അഭിജിത്ത് (23), സഹോദരൻ അജിത്ത് (20), മുട്ടട സ്വദേശി അനസ് (21) തിരുമല സ്വദേശി സുധി (21) എന്നിവരാണ് നേരത്തെ പിടിയിലായവർ. തിരുവനന്തപുരം പേയാട് പള്ളിമുക്കിൽ വെച്ചാണ് കേസിനാസ്പദമായ സംഭവം.

കഴിഞ്ഞ മാസം 27-ന് രാത്രിയാണ് പേയാടുള്ള പെട്രോൾ പമ്പിൽ ബൈക്കിലെത്തിയ അഞ്ചംഗ സംഘം പെട്രോൾ പമ്പ് ജീവനക്കാർക്കെതിരെ അക്രമം നടത്തിയത്. കുടിവെള്ളത്തിന് തണുപ്പ് കുറവാണെന്ന് ആരോപിച്ചായിരുന്നു ഇവരുടെ അതിക്രമം. പമ്പിലെ ജീവനക്കാരായ ശ്രീജയൻ, സുരേഷ് കുമാർ എന്നിവരെ ആക്രമിച്ച പ്രതികൾ പമ്പിൽ നാശനഷ്ടങ്ങൾ വരുത്തുകയും ചെയ്തിരുന്നു.